ბათუმის საერთაშორისო კონფერნციაზე აღმოსავლეთ პარტნიორობის შესახებ იმსჯელეს

ბათუმის საერთაშორისო კონფერენციის “საქართველოს ევროპული გზა” ფარგლებში გამართული პირველი სესია აღმოსავლეთ პარტნიორობის თემატიკას მიეძღვნა. ცოტა ხნის წინ კონფერენციაზე აღმოსავლეთ პარტნიორობის ქვეყნებსა და ევროკავშირს შორის ორმხრივი და მრავალმხრივი თანამშრომლობის ფორმატები განიხილეს.

მონაწილეებს მისასალმებელი სიტყვით მიმართა საქართველოს საგარეო საქმეთა მინისტრის მოვალეობის შემსრულებელმა მიხეილ ჯანელიძემ, რომელმაც აღმოსავლეთ პარტნიორობის მნიშვნელობასა და მიზნებზე, ასევე აღიშნულ ფორმატში წარმატებულ თანამშრომლობაზე ისაუბრა.

საკუთარ გამოსვლაში მიხეილ ჯანელიძემ აღნიშნა, რომ მიხეილ ჯანელიძის თქმით, საქართველო განუხრელად მიუყვება ევროპულ გზას, რომელიც წინაპრებმა საუკუნეების წინ განსაზღვრეს. მისი შეფასებით საქართველო-ევროკავშირის თანამშრომლობა სრულიად ახალ ეტაპზეა და დღეს საქართველო ისე ახლოსაა ევროპულ ოჯახთან როგორც არასდროს.

ასევე, მან ყურადღება გაამახვილა საქართველოს მთავრობის მიერ შემუშავებულ „საგზაო რუკაზე“, რაც მისი თქმით საქართველოს ევროკავშირთან მეტ ინტეგრაციას ისახავს მიზნად. როგორც საგარეო საქმეთა მინისტრის მოვალეობის შემსრულებელმა აღნიშნა ამ მიმართულებით გამოყენებული იქნება როგორც ევროკავშირთან თანამშრომლობის არსებული მექანიზმები, ასევე ახალი შესაძლებლობები და გაკეთდება იმაზე მეტი, ვიდრე ასოცირების შეთანხმება ითვალისწინებს.

სესიას სახელწოდებით “აღმოსავლეთ პარტნიორობა ბრიუსელის სამიტის შემდგომ – შესაძლებლობები მომავალი თანამშრომლობისთვის”  მოდერაციას უწევდა ავსტრიის ევროპის, ინტეგრაციისა  საგარეო საქმეთა ფედერალური სამინისტროს საგანგებო დავალებათა ელჩი აღმოსავლეთის პარტნიორობის საკითხებში თომას ბუხსბაუმი. სიტყვით ასევე წარსდგნენ ევროკომისიის სამეზობლო პოლიტიკისა და გაფართოების შესახებ მოლაპარკებათა საკითხებში გენერალური დირექტორი კრისტიან დანიელსონი, მოლდოვას რესპუბლიკის საგარეო საქმეთა და ევროპული ინტეგრაციის სამინისტროს სახელმწიფო მდივანი დანიელა მორარი და ბელარუსის წარმომადგენლობითი პალატის მუდმივი კომისიის თავმჯდომარე საერთაშორისო საკითხებში ვალერი ვორონეცკი.

კონფერენციის მონაწილეებმა ასევე იმსჯელეს ევროკავშირის საბჭოში ავსტრიის მომავალი თავმჯდომარეობის ხედვაზე აღმოსავლეთ პარტნიორობასთან მიმართებით.  დისკუსიის დროს აქცენტი გაკეთდა 2020 წლისთვის ძირითად პრიორიტეტებსა და ხელშესახებ  შედეგებზე.
აღნიშნული სესია კითხვა-პასუხის ფორმატში ჩატარდა.

ბათუმის საერთაშორისო კონფერენცია 14-15 ივნისს გაგრძელდება. ღონისძიების ორგანიზატორია საქართველოს საგარეო საქმეთა სამინისტრო. კონფერენციაში მონაწლიეობას იღებენ საქართველოს, ევროკავშირის და „აღმოსავლეთ პარტნიორობის“ წევრი ქვეყნების აღმასრულებელი და საკანონმდებლო ხელისუფლების წარმომადგენლები,  ასევე, სამოქალაქო საზოგადოების, აკადემიური წრეების, მედიისა და ბიზნესსექტორის წარმომადგენლები.

ნეტგაზეთის მასალების სხვა გამოცემებში გადაბეჭდვის წესი


ავტორი
ია ფრანგიშვილი არის გაზეთ "ბათუმელების" რეპორტიორი 2014 წლიდან