ამერიკის შეერთებული შტატების მოქალაქე ამბობს, რომ ბათუმში ერთ-ერთ ღამის კლუბში თანხა გამოსძალეს. რობი [სახელი შეცვლილია] კალიფორნიის უნივერსიტეტის დოქტორანტია და კონკრეტული თემის საკვლევად ერთი წლით ჩამოვიდა საქართველოში. რობიმ სამეცნიერო კვლევა ბათუმში შემოდგომაზე დაიწყო.
„23 ნოემბერს მეჩეთთან ახლოს თურქი ეროვნების კაცი გავეცანი. მითხრა, მურატი მქვიაო. შემომთავაზა ღამის კლუბში წავიდეთ, კარგად გავერთობითო, კლუბი ჩემია და ფულზე არ იდარდოო. მაინც უარი ვთქვი იმ დღეს კლუბში წასვლაზე, თუმცა ტელეფონის ნომრები გავუცვალეთ ერთმანეთს. მეორე დღეს მურატი ისევ შემეხმიანა ტელეფონით“, – გვიყვება რობი.
მან სატელეფონო ქსელში მურატის შეტყობინებები გვაჩვენა, მათ შორის, კლუბში გადაღებული ცეკვის ამსახველი ვიდეოები. 25 ნოემბერს, საღამოს 10 საათზე მურატი და რობი აღმაშენებლის ქუჩაზე მდებარე ერთ-ერთ ღამის კლუბში ერთად მივიდნენ [„ბათუმელები“ კლუბის სახელს არ ასახელებს, რადგან კლუბის წარმომადგენლებთან დაკავშირება ამ დროისთვის ვერ მოვახერხეთ].
„კლუბში ხილი შევუკვეთე და ენერგეტიკული სასმელი, შემდეგ ერთი ბოთლი ლუდიც დავლიე. მურატი ჩემს გვერდით დაჯდა. მან ვისკი და თხილი შეუკვეთა. მურატიმ მითხრა, რომ მას საუკეთესო გოგონები ჰყავდა უკრაინიდან, სომხეთიდან, უზბეკეთიდან და აზეირბაიჯანიდან. მოცეკვავე გოგონა მაგიდებთან რიგ-რიგობით მოდიოდა და ცეკვავდა, ფულს მთხოვდა, მაგრამ არ მივეცი… ცოტა ხანში წამოსვლა გადავწყვიტე და ანგარიში ვითხოვე“, – გვიყვება რობი.
ანგარიშის ფურცელზე ეწერა, რომ რობის 450 ლარი ჰქონდა გადასახდელი. რობიმ მიმტან ბიჭს უთხრა, რომ ფასი შეუსაბამო იყო და ასევე ვისკი და თხილი მას არ შეუკვეთია. ამ დროს მურატი კლუბში აღარ ჩანდა. რობიმ თანხის გადახდაზე უარი თქვა თუ არა, მასთან ერთი კაცი მივიდა, რომელმაც უთხრა, რომ კლუბის მესაკუთრე ის იყო.
„მას ედვანი ერქვა, ირანელია. დაცვის თანამშრომლებიც შემოვიდნენ. მუქარა არ ყოფილა, მაგრამ ეს იყო დაშინება. კუნთმაგარი ბიჭები იყვნენ და საუბრის დროს ოდნავ მეხებოდნენ სხეულით, რომ მეგრძნო მათი ფიზიკური სიძლიერე. ისინი მხოლოდ კითხვას სვამდნენ და იმეორებდნენ: რა პრობლემაა, რა პრობლემაა?“ – იხსენებს რობი.
რობიმ საბანკო ამონაწერიც გვაჩვენა, რომლის მიხედვითაც მისი საკრედიტო ბარათიდან 25 ნოემბრის საღამოს 171 დოლარი და 96 ცენტია გადახდილი ამ კლუბის ანგარიშზე. თანხის გადახდის შემდეგ რობის კლუბი არ დაუტოვებია.
„მურატი დაიკარგა, მაგრამ ედვანმა სცადა ჩემთან დაახლოება. როცა დარწმუნდა, რომ ამერიკელი ვიყავი, მითხრა, იქნებ ჩამოვსხდეთ, გაერთე, ფულზე არ იდარდოო. მაგიდასთან დავსხედით, სადაც ისევ მოიტანეს ხილი, თხილი, სასმელი… მალე გავიფიქრე, რომ ამის გადახდაც მე მომიწევდა და წამოვედი. გარეთ დაცვის თანამშრომლებმა გამაჩერეს, გადაიხადე ყველაფერიო? ედვანი მოვიდა და თქვა, რომ ყველაფერი გადახდილი მაქვს და გამომიშვეს,“ – აღნიშნავს რობი.
რობის პოლიციისთვის არ მიუმართავს. ამბობს, რომ არ იცოდა, რამდენად ეფექტურად მუშაობს პოლიცია ამ ტიპის დანაშაულის გახსნაზე. მას თანხის დაბრუნებაზე მეტად სამართლიანობა აღელვებს და ამის გამო გადაწყვიტა თავისი ისტორიის მედიისთვის მოყოლა.
რობი ამბობს, რომ ბათუმში, ევროპის მოედანზე ორი დღის წინაც დაინახა მურატი.
ამავე თემაზე:
