ლაშა კომახიძე მერიის ანსამბლის რუსეთში გასტროლების დაფინანსებაზე

გასულ წელს ბათუმის მერიის ქორეოგრაფიული ანსამბლის შესაძლო გასტროლზე რუსეთის ქალაქებში საზოგადოების მხრიდან დიდი გამოხმაურება მოყვა. მერიაში განმარტეს, რომ ღონისძიების შესახებ, რომელიც საკრებულოსთვის განსახილველად გადაგზავნილ ბიუჯეტის პროექტში  იყო ჩაწერილი, მერთან შეთანხმებული არ ყოფილა. ვიზიტი ჩაიშალა.

„ბათუმელები“ დაინტერესდა, რას გადაწყვეტს ბათუმის ახალარჩეული მერი თუ მერიის რომელიმე ორგანიზაცია რუსეთში მიწვევას ისევ მიიღებს:

დააფინანსებთ თუ არა მუნიციპალური ანსამბლების რუსეთში ვიზიტს გასტროლით მიწვევის შემთხვევაში? – ამ კითხვის პასუხად ლაშა კომახიძემ „ბათუმელებს“ უთხრა:

„თქვენ ალბათ ხაზს უსვამთ პოლიტიკურ მომენტს საქართველოს და რუსეთს შორის. მე ამაზე არ მინდა გავაკეთო კომენტარი შეგნებულად, ზოგადად მე იმ პოზიციაზე ვდგავარ, რომ კულტურა და განათლება ეს ისეთი სფეროებია, რომლებიც ნებისმიერ პოლიტიკაზე მაღლა დგას. თუმცა მე ამ ეტაპზე ამას არც თანხმობის ნიშნად და არც უარყოფის ნიშნად არ გეუბნებით, სპორტული ღონისძიებები, კულტურული ღონისძიებები ტარდება იმ სახელმწიფოებს შორისაც კი, მესამე ქვეყნის ტერიტორიაზე, რომლებიც ერთმანეთს მტრობენ და რომელთა შორისაც მიმდინარე პერიოდშიც, პირდაპირი მნიშვნელობით, ომია  გაჩაღებული. ეს, რა თქმა უნდა, ძალიან მგრძნობიარე თემაა, თუმცა კიდევ ერთხელ ვამბობ, რომ კულტურა და პოლიტიკა უნდა გავმიჯნოთ ერთმანეთისაგან და შევეცადოთ, რომ მივცეთ შემოქმედებით ჯგუფებს, შემოქმედებით მიმართულებას განვითარების საშუალება და გაძლიერების საშუალება“.

 

ნეტგაზეთის მასალების სხვა გამოცემებში გადაბეჭდვის წესი
ავტორი