Batumelebi | „აჭარისწყალი ჯორჯია“ გოდერძის ალპური ბაღის განვითარებას 100 000 დოლარით აფინანსებს „აჭარისწყალი ჯორჯია“ გოდერძის ალპური ბაღის განვითარებას 100 000 დოლარით აფინანსებს – Batumelebi
RU | GE  

„აჭარისწყალი ჯორჯია“ გოდერძის ალპური ბაღის განვითარებას 100 000 დოლარით აფინანსებს

კომპანია აჭარისწყალი ჯორჯია „გოდერძის“ ალპური ბაღის განვითარებას 100 000 ამერიკული დოლარით დააფინანსებს. კომპანიის აღმასრულებელმა დირექტორმა რონი სოლბერგმა და ბათუმის ბოტანიკური ბაღის დირექტორმა, ირაკლი არჩაიამ საგრანტო ხელშეკრულებას ხელი გასულ კვირას მოაწერეს.

საქართველოში წარმოდგენილ ბოტანიკურ ბაღებს შორის (თბილისი, ბათუმი, ბაკურიანი, ზუგდიდი) კლიმატური პირობებიდან გამომდინარე, დღემდე მხოლოდ ბაკურიანის ბოტანიკურ ბაღს გააჩნდა ალპური ბაღი. აქ ალპურ მცენარეთა 1200-მდე სახეობა 1.5 ჰექტარზეა გაშენებული. „გოდერძის“ ალპური ბაღი გაცილებით დიდი და მრავალფეროვანი იქნება და დაახლოებით 10 ჰექტარს დაიკავებს. ბაღი გაშენდება კურორტ ბეშუმთან დამაკავშირებელი ცენტრალური გზის ჩრდილო-აღმოსავლეთით, გოდერძის უღელტეხილის მიმდებარედ. შერჩეული ტერიტორია მოიცავს: ფერდობებს, ჭარბტენიან მონაკვეთებს, ბუნებრივ ტბებსა და ნაკადულებს.

კომპანია „აჭარისწყალი ჯორჯიას“ მიერ განხორციელებული ინვესტიცია მოიცავს ალპურ ბაღში მზის ენერგიის სისტემის და პარკინგის მოწყობას, ბაღის თანამშრომლებისთვის დროებითი ადმინისტრაციული შენობის მშენებლობასა და აღჭურვას, საპიკნიკე ადგილების და ბუნებრივი ბილიკების მოწყობას, სეპტიკისა და კანალიზაციის მოწყობას, ეკო ტუალეტების და ბილეთების ჯიხურის მშენებლობას, საინფორმაციო ნიშნულების, დაფების, რუკებისა და ბროშურების დიზაინის შემუშავება-ბეჭდვას, ასევე, მეფუტკრის სახლის მშენებლობას, მეფუტკრეობის განვითარებისთვის საჭირო ინვენტარით აღჭურვას და ფუტკრის ოჯახების შეძენას.

„გოდერძის“ ალპური ბაღის განვითარება ერთ-ერთი ყველაზე მნიშვნელოვანი პროექტია, რაც კი ჩვენს კომპანიას კორპორაციული სოციალური პასუხისმგებლობის ფარგლებში დაუფინანსებია. ეს არის პროექტი, რომელიც ხელს შეუწყობს ტურიზმის განვითარებას მაღალმთიან აჭარაში. ჩვენ ვაშენებთ შუახევიჰესს და ამავდროულად ვახორციელებთ არაერთ სოციალურ პროექტს. ესაა: ადგილობრივი ბიზნესის ხელშეწყობა, ინფრასტრუქტურული პროექტები, განათლების მხარდაჭერა… ვფიქრობ, ალპური ბაღის დაარსება, სხვა სოციალურ პროექტებთან ერთად, მნიშვნელოვნად შეუწყობს ხელს მაღალმთიანი აჭარის გრძელვადიან განვითარებას“ , – განაცხადა კომპანიის აღმასრულებელმა დირექტორმა რონი სოლბერგმა.

რონი სოლბერგი

რონი სოლბერგი

ბათუმის ბოტანიკური ბაღი თავის მხრივ წამყვან როლს შეასრულებს ალპური ბაღის დაგეგმარებაში და ამავდროულად გამოიყენებს ყველა საჭირო შიდა რესურსს (მატერიალური, ინტელექტუალური და ტექნიკური), რათა შექმნას დამატებითი სამუშაო ადგილები ადგილობრივი მოსახლეობისთვის, გამოყოს დამატებითი სახსრები საკუთარ ბიუჯეტში გოდერძის ალპური ბაღისთვის და უზრუნველყოს მისი გამართული ფუნქციონირება.

„დღევანდელი დღე ძალიან მნიშვნელოვანია ბათუმის ბოტანიკური ბაღისთვის, სწორედ დღეს მოეწერა ხელი ხელშეკრულებას ბოტანიკურ ბაღსა და კომპანია „აჭარისწყალ ჯორჯიას“  შორის. კომპანია „გოდერძის“ ალპური ბაღის მშენებლობისთვის 100 000 დოლარის ინვესტიციას განახორციელებს. ვფიქრობ, პროექტი მომავალ წელს დასრულდება და უკვე ზაფხულში პირველი ვიზიტორების მიღებას შევძლებთ“, – განაცხადა ბათუმის ბოტანიკური ბაღის დირექტორმა ირაკლი არჩაიამ.

ბათუმის ბოტანიკური ბაღის დირექტორი ირაკლი არჩაია, „აჭარისწყალი ჯორჯიას" აღმასრულებელი დირექტორი რონი სოლბერგი და კომპანიის მიწის და სოციალურ საკითხთა დირექტორი ზვიად დიასამიძე

ბათუმის ბოტანიკური ბაღის დირექტორი ირაკლი არჩაია, „აჭარისწყალი ჯორჯიას” აღმასრულებელი დირექტორი რონი სოლბერგი და კომპანიის მიწის და სოციალურ საკითხთა დირექტორი ზვიად დიასამიძე

ალპური ბაღის მშენებლობა და განვითარება მცირე კავკასიის ალიანსების პროგრამის მხარდაჭერით დაიწყო, რომელსაც არასამთავრობო ორგანიზაცია „მერსი ქორფსი“ შვეიცარიის განვითარებისა და თანამშრომლობის სააგენტოს დაფინანსებით ახორციელებს.

გრანტის გაცემა მიზნად ისახავს მხარეებმა ხელი შეუწყონ „გოდერძის“ ალპური ბაღის დაარსებასა და განვითარებას, რომელიც იქნება სოფლად ტურიზმის, საგანმანათლებლო და საკვლევი მდგრადი რეგიონალური ცენტრი, სოფლის მდგრადი განვითარების საუკეთესო პრაქტიკის სადემონსტრაციო კერა და ამავე დროს სტიმულს მისცემს მაღალმთიან აჭარაში მცხოვრებლებს შესაძლებლობების განვითარებისათვის. ეს ასევე მოიცავს ადგილობრივი პროდუქტების დამატებითი გასაღების ბაზრის შექმნას.

პროექტის მიზანია, ხელი შეუწყოს ბოტანიკურ ბაღს, ადგილობრივად, სპეციფიკურ მცენარეთა მრავალფეროვნების შენარჩუნებაში; უზრუნველყოს რელიქტური, ენდემური, იშვიათი, საკვები, სამკურნალო, სამეურნეო, დეკორატიული და სხვა სასარგებლო თვისებებით გამორჩეულ სახეობათა კონსერვაცია, რათა შენარჩუნდეს აჭარის უნიკალური ეკოსისტემა და მოხდეს ალპურ ბაღში თავმოყრილი კოლექციის გამოყენება სამეცნიერო, საგანმანათლებლო, შემეცნებითი და ტურისტული მიზნებისათვის.

„გოდერძის“ ალპური ბაღის განვითარება ტურიზმის ხელშეწყობის ერთ-ერთი მნიშვნელოვანი პირობა იქნება მაღალმთიან აჭარაში.

ნეტგაზეთის მასალების სხვა გამოცემებში გადაბეჭდვის წესი
ავტორი