25 წლის დათო დავითაძის მკვლელობის საქმის განხილვა მოსამართლე დავით მამისეიშვილმა გასულ კვირას დაასრულა. ბათუმის საქალაქო სასამართლომ განზრახ მკვლელობის ბრალდებით 1984 წელს დაბადებულ ზურაბ საჯაიას 8-წლით პატიმრობა მიუსაჯა.
დათო დავითაძე შუახევის ცენტრში 2015 წლის 3 მაისს დაჭრეს. საქმის მასალების მიხედვით, ზურაბ საჯაიამ ურთიერთშელაპარაკების დროს მას მუცლის არეში მიაყენა ჭრილობა და მიიმალა. როგორც თვითმხილველები ყვებოდნენ, დაჭრილი თავისი ფეხით მივიდა კომპანია „ევექსის” კლინიკაში, სადაც რამდენიმე საათში გარდაიცვალა. იმ დროს გარდაცვლილის ახლობლების მსგავსად, აჭარის ჯანდაცვის სამინისტრომაც დაადასტურა, რომ კლინიკა „ევექსმა” სახელმწიფოსთან აღებული ვალდებულების შესრულება – სამედიცინო მომსახურების გაწევა ვერ შეძლო: საავადმყოფოში არ იმყოფებოდნენ ქირურგები, ანესთეზიოლოგი, ასევე არ იყო რეანომობილის ჯგუფი.
დაჭრილი დათო დავითაძის სიკვდილის მიზეზად სისხლნაკლებობა დაასახელა სასამართლოს ერთ-ერთ სხდომაზე ექსპერტმა მამუკა მეტრეველმა. ამის მიუხედავად, ბოლო სასამართლო პროცესზე პროკურორმა რამაზ შავაძემ თქვა, რომ დაჭრილს „ევექსის“ კლინიკაში ადეკვატური სამედიცინო მომსახურება გაუწიეს.
კომპანია „ევექსის~ წინააღმდეგ სასამართლოში სარჩელის შეტანას გეგმავს გარდაცვლილის მამა – დავით დავითაძე: „აუცილებლად უნდა დადგეს შუახევის საავადმყოფოს პასუხისმგებლობის საკითხი. ჯანმრთელობის პრობლემების გამო აქამდე ეს ვერ გავაკეთე, მაგრამ აუცილებლად მივმართავ ადვოკატს დახმარებისთვის”.
მსჯავრდებული ზურაბ საჯაია ყოფილი პატიმარია. ის ხელისუფლებამ პოლიტიკური პატიმრის სტატუსით 2012 წლის საპარლამენტო არჩევნების შემდეგ მალევე გაათავისუფლა. ზურაბ საჯაია პოლიტიკური პატიმრების სიაში უშუალოდ “ქართული ოცნების” მიერ იყო შეყვანილი. ზურაბ საჯაიამ ბათუმში, სასამართლოს ერთ-ერთ სხდომაზე მოსამართლეს განუცხადა, რომ პირველ შემთხვევაში დიდი ოდენობით ნარკოტიკული ნივთიერების შეძენის გამო იხდიდა სასჯელს.
პატიმრობიდან გათავისუფლების შემდეგ ზურაბ საჯაია შუახევში, ჰესების მშენებარე კომპანია – “აჭარისწყალ ჯორჯიაში” დასაქმდა. ურთიერთშელაპარაკება გარდაცვლილ დათო დავითაძესა და ზურაბ საჯაიას შორის შუახევში, ბენზინგასამართ სადგურთან მოხდა. გამოძიების მასალებით, საჯაიამ დავითაძე დანით დაჭრა და შემთხვევის ადგილიდან მიიმალა.
