ეკომიგრანტების ერთი ჯგუფი თითქმის ჩურჩულით ამბობს, რომ ბავშვთა სახლში შეჭრის უფლება მთავრობამ მისცა. ოფიციალურად კი მათ გადაწყვეტილებას ეკომიგრანტი ამირან საგინაძე, რომელმაც აჭარის მთავრობის ადმინისტრაციული შენობის წინ 65 დღე გატარა, ასე აყალიბებს: `სადმე თავი უნდა შეგვეფარებინა, ლტოლვილთა და განსახლების სამინისტროდანაც იყო მოწოდება, რომ გამოგვენახა ერთობლივად რაიმე საშუალება, სახელმწიფოზე დაქვემდებარებულ უფუნქციო შენობაში უნდა შევსულიყავით. გამოვნახეთ ეს შენობა, რომელიც უფუნქციოა და დროებით თავშესაფრად ვაქციეთ. 120 ადამიანი ვართ ძალიან ცუდ პირობებში, სველი წერტილიც კი არ არის~.
ყოფილი მოშიმშილეები ამბობენ, რომ მათი მდგომარეობა მძიმეა, ერთი მათგანი თბილისში, საავადმყოფოშია მოთავსებული. შიმშილობის შეწყვეტის შემდეგ ეკომიგრანტებს სამედიცინო შემოწმება არ გაუვლიათ: `შიმშილის შეწყვეტის შემდეგ ექიმს არ გავუსინჯივარ, 65 კილოზე ჩამოვედი, წნევა დამივარდა, საჭმელს ვერ ვჭამ, ყავას ვსვამ, რომ წნევა ავიმაღლო~, – ამბობს ჯუმბერ რიჟვაძე.
„სახლი რომ გვქონდეს წალკაში, ამდეხანს აქ გავჩერდებოდით? კომისიამ დაამტკიცოს, რომ სადმე გვაქვს სახლები, თუ ერთი ოთახი მაინც აღმომაჩნდება, მივდივარ უკან. ნუთუ ამის დადგენა შეუძლებელი გახდა, იმდენი არ ვართ, რომ ეს გაუჭირდეთ, პირადობაც ეყოფა მაგის შემოწმებას. ქვრივი ქალი ვარ, სირცხვილი არ არის, ასე რომ ვყვირი? იქ არავინ გვაძლევს მიწას და სახლს, აქამდე ყველაფერს, მათ შორის მიწასაც ვქირაობდით. თუ გაგვიფორმებენ იქ საკუთრებას, რა თქმა უნდა, წავიდოდით უკან, აქ დასასვენებლად ან მონატრების გამო არ დავბრუნებულვართ“, – ამბობს ცირა დავითაძე, რომელიც ცუდად ყოფნის გამო უკვე მოინახულეს ექიმებმა. ცირა დავითაძე ერთადერთია, ვისაც საწოლზე დაწოლის უფლება მისცეს.
ეკომიგრანტები მთავრობის წარმომადგენლების განცხადებას იმის თაობაზე, რომ მათ სახლები აქვთ, არასახელწიფოებრივს უწოდებენ. ეკომიგრანტი ამირან საგინაძე: „ეს ადამიანები არასახელმწიფოებრივად აზროვნებენ, თუ უნდათ კუთხის შენარჩუნება, მაშინ ასე არ უნდა საუბრობდნენ, წალკის შენარჩუნება უნდოდათ ჩვენი იქ ჩასახლებით, შეინარჩუნეს კიდეც. შევარდნაძე და სააკაშვილი იძულებულს ხდიდა ხალხს იქ ჩასახლებულიყო, ახლა ლაპარაკობენ, რომ ჩვენ თვითნებურად ჩავსახლდით? როგორ შეიძლება ასე? ასეთი ადამიანები ამ თანამდებობებს არ უნდა იკავებდნენ. ჩვენ იძულებით ჩაგვასახლეს და იძულებით წამოვედით ახლა უკან, არავითარი თვითნებობა არ ყოფილა, პროგრამის მიხედვით ჩვენ უნდა გვქონოდა იქ სახლი და 5 ჰექტარი მიწა. რომ არ გვაქვს, იმიტომ წამოვედით. ჩვენ ვითხოვთ დროებით თავშესაფარს აჭარაში, იქ საკუთრება არ გვაქვს, იმ სახლებში ბერძნები დაბრუნდნენ, საუბარი, რომ იქ ჩვენ საკუთრება გაქვს და ბერძნების დაბრუნება მოვიგონეთ, უცოდინარობის შედეგია, არასახელმწიფოებრივად ლაპარაკობენ, შეამოწმონ“.
ბათუმში 12 ივლისს გაიხსნა კონფერენცია „საქართველოს ევროპული გზა“, რომელზე დასასწრებადაც ბათუმში ევროკომისარი შტეფან ფულე ჩამოვიდა. ეკომიგრანტები ურეხის ბავშვთა სახლში 11 ივლისს ღამის 3 საათზე შევიდნენ.
მოქალაქეებს, რომლებიც უკვე 65 დღეა თავიანთი პრობლემის მიმართ მთავრობის ყურადღების მიპყრობას ითხოვენ, როგორც ადგილობრივი, ისე ცენტრალური ხელისუფლების წარმომადგენლები მატყუარებს უწოდებენ.
