8 ოქროს, 16 ვერცხლისა და 9 ბრინჯაოს _ ეს მედლები ჩამოიტანეს საქართველოს მკლავჭიდელებმა ევროპის ჩემპიონატიდან. ჩემპიონატი სამ ასაკობრივ კატეგორიაში დიდებში, ახალგაზრდებსა და ჭაბუკებს შორის ჩატარდა, საქართველოს ნაკრების მკლავჭიდელებმა სამივე კატეგორიაში საპრიზო ადგილები დაიკავეს და გუნდური მეორე ადგილიც მოიპოვეს.
ევროპის ჩემპიონატი მკლავჭიდში ბულგარეთის დედაქალაქ სოფიაში 1-7 ივნისს ჩატარდა. ყველაზე პრესტიჟულ მძიმე წონაში (+110 კგ) ჩემპიონი ლევან საგინაშვილი გახდა, რომელმაც გასულ წელს ასევე ჩემპიონობა მსოფლიო მასშტაბითაც მოიპოვა. საქართველოს ნაკრების მთავარი მწვრთნელი ვახტანგ მუსელიანია. ასევე უფროსებს შორის, 55 კილოგრამ წონით კატეგორიაში, ჩემპიონი ალექსი ფრეწუაშვილი, ხოლო 65 კგ. წონით კატეგორიაში ჯამბულ ვიბლიანი გახდა.
ჩემპიონატში მონაწილეობდა საქართველოს შეზღუდული შესაძლებლობების მქონე სპორტსმენთა ნაკრებიც, რომელმაც 5 ვერცხლისა და 2 ბრინჯაოს მედალი მოიგო. აჭარიდან ოთხი მკლავჭიდელი – ზურაბ თავბერიძე, ლევან პოღოსიანი, გოგიტა ხიმშიაშვილი და მერაბ კაკაბაძე მონაწილეობდნენ. მათ შორის საპრიზო ადგილი, ვიცე-ჩემპიონობა (მარჯვენა და მარცხენა მკლავში) 86 კილოგრამ წონით კატეგორიაში ზურაბ თავბერიძემ დაისაკუთრა. მან ორი წლის წინ დაიწყო მკლავჭიდში ასპარეზობა ეს კი მისთვის პირველი გასვლა იყო ევროპის ჩემპიონატზე.
ზურაბ თავბერიძე: „კარგად ვიყავი მომზადებული. სიმართლე გითხრა, ჩემპიონობას ვგეგმავდი და ფავორიტი ვიყავი-მეთქი არა. რა თქმა უნდა, იმედი მქონდა. ჩემ წონაში მარცხენა ხელში გამოდიოდა უკრაინელი ოლენ ზოხი, რომელიც, ფაქტობრივად, დაუმარცხებელია მარცხენა ხელში. ვიბრძოლე და მეორე ადგილზე გავედი. მარჯვენა ხელში ასევე ფინალამდე მივაღწიე და ფინალში დავმარცხდი ჰაჯი მურად ზალოევთან (რუსეთი), რომელიც ბოლო 10 წელია დაუმარცხებელია. შედეგით მეც კმაყოფილი ვარ. პირველი ევროპის ჩემპიონატი იყო ჩემთვის. მეორე წელია რაც ოზურგეთიდან ბათუმში გადმოვედი სავარჯიშოდ. რვა წლიდან მოჭიდავე ვიყავი, ძიუდოისტი. მერე ტრავმები მქონდა და შევეშვი. ვთამაშობდი რაგბსაც. ახლა მსოფლიო ჩემპიონატისთვის ვაპირებ მომზადებას, რომლის ჩატარება მალაიზიაში ოქტომბრისთვისაა ჩანიშნული. ვიმედოვნებ გავაუჯობესებ შედეგს და მსოფლიო ჩემპიონის ტიტულით დავბრუნდები“.
ევროპის ჩემპიონატი მკლავჭიდში
საქართველოს ნაკრების მკლავჭიდელების შედეგი
18-წლამდე
ოქრო – ირკალი ზირაქაშვილი (65 კგ. მარჯვენა)
ოქრო – ირაკლი ზირაქაშვილი (65 კგ. მარცხენა)
ოქრო – გიორგი მელიქიშვილი (80 კგ. მარჯვენა)
ვერცხლი – ნიკოლოზ ბაჟალაძე (+ 80 კგ. მარჯვენა)
ვერცხლი – გოჩა სიჭინავა (65 კგ. მარცხენა)
ვერცხლი – მერაბ ბროლიანი (70 კგ. მარცხენა)
ვერცხლი – თორნიკე გიგაური (75 კგ. მარცხენა)
ვერცხლი – ნიკოლოზ ბაჟალაძე (+80 კგ. მარცხენა)
ვერცხლი – თორნიკე გიგაური (75 კგ. მარჯვენა)
ბრინჯაო – ლევან დავითაშვილი (55 კგ. მარჯვენა)
21-წლამდე
ოქრო – ალექსი ზავრაშვილი (60 კგ. მარჯვენა)
ოქრო – იმედა ჭინჭარაული (60 კგ. მარცხენა)
ვერცხლი – ალექსი ზავრაშვილი (60 კგ. მარცხენა)
ვერცხლი – გურამ აბულაშვილი (65 კგ. მარცხენა)
ვერცხლი – გიორგი ჯაშიაშვილი (55 კგ. მარჯვენა)
ვერცხლი – გურამ აბულაშვილი (65 კგ. მარჯვენა)
ვერცხლი – ელჩინ ბინატოვი (80 კგ. მარჯვენა)
ბრინჯაო – გიორგი ჯაშიაშვილი (55 კგ. მარცხენა)
ბრინჯაო – იმედა ჭინჭარაული (60 კგ. მარჯვენა)
დიდები
ოქრო – ლევან საგინაშვილი (+110 კგ. მარჯვენა)
ოქრო – ალექსი ფრეწუაშვილი (55 კგ. მარჯვენა)
ოქრო – ჯამბულ ვიბლიანი (65 კგ. მარჯვენა)
ვერცხლი – ზურაბ თავბერიძე (80 კგ. მარჯვენა)
ვერცხლი – ალექსი ფრეწუაშვილი (55 კგ. მარცხენა)
ვერცხლი – ჯამბულ ვიბლიანი (65 კგ. მარცხენა)
ვერცხლი – ზურაბ თავბერიძე (80 კგ. მარცხენა)
ვერცხლი – ლევან საგინაშვილი (+ 110 კგ, მარცხენა)
ბრინჯაო – ზაზა კობაიძე (85 კგ. მარცხენა)
ბრინჯაო – ირაკლი გამთენაძე (90 კგ. მარცხენა)
ბრინჯაო – ვილენ გაბრავა (65 კგ. მარცხენა)
ბრინჯაო – ზაურ ხუბაშვილი (55 კგ. მარჯვენა)
ბრინჯაო – ვასილ დაუთაშვილი (100 კგ. მარჯვენა)
ბრინჯაო – იმედა ჭინჭარაული (60 კგ. მარცხენა)
