Batumelebi | ”PSP”-მ ”TTC”-ს ჩემპიონობა ორი გოლით დაასწრო ”PSP”-მ ”TTC”-ს ჩემპიონობა ორი გოლით დაასწრო – Batumelebi
RU | GE  

”PSP”-მ ”TTC”-ს ჩემპიონობა ორი გოლით დაასწრო

 

 

მინი-ფეხბურთში საქართველოს ჩემპიონი „PSS“-ს გუნდი გახდა, რომელმაც ფინალში თბილისის სატრანსპორტო კომპანიის (TTC) გუნდი 2:0 დაამარცხა. TTC ვიცე-ჩემპიონობას დასჯერდა, მესამე ადგილი კი „ბორჯომმა“ დაიკავა. ჩემპიონატი  ბათუმში, სპორტულ-ახალგაზრდულ ცენტრში 27-28 სექტემბერს მიმდინარეობდა.

საქართველოს ჩემპიონატი მინი-ფეხბურთში 2014

„ჩვენი გუნდი 2010 წელს ჩამოყალიბდა. ასეთ მასშტაბურ ტურნირში არ მიგვიღია მონაწილეობა და საკმაოდ რთულად დავიწყეთ – ზედიზედ სამი თამაში წავაგეთ. შემდეგ მოვიკრიბეთ ძალები, უფრო მეტი მოვინდომეთ და გავედით ჯგუფიდან, სადაც მერვედ ფინალში, ძლიერი მეტოქე ბათუმის „ბათუმი“2:1 დავამარცხეთ. ნახევარფინალში ბორჯომის გუნდს 2:1 მოვუგეთ. ტურნირს ვუსურვებდი უფრო მეტი გუნდი ყოფილიყოს ჩართული, რაც მინი ფეხბურთის პოპულარიზებას შეუწყობს ხელს“ – ამბობს „PSP“-ს  გუნდის კაპიტანი გივიკო კაციტაძე.

ჩემპიონატზე დაწესებული იყო საპრიზო ფონდიც. პირველ ადგილზე გასულმა გუნდმა 4000 ლარი მოიგო, ხოლო TTC-ს 2000 ლარი ერგო.

ჩემპიონატის ორგანიზატორმა საქართველოს ეროვნულმა ფედერაციამ „სპორტი ყველასათვის“ რვა ნომინაცია გამოავლინა.

საუკეთესო ფეხბურთელი (MVP) „PSP“-ს  ფორვარდი ლევან სარდანაშვილი გახდა, რომელსაც სამახსოვრო პრიზთან ერთად, სპეციალურად ამ ნომინაციისთვის დამზადებული ჯილდო გადაეცა.

ჩემპიონატის ნომინირებული ასევე გახდნენ:

საუკეთესო მეკარე – ბექა სიბაშვილი (TTC)
საუკეთესო მცველი – გივიკო კაციტაძე (PSP)
საუკეთესო თავდამსხმელი – შოთა ჩომახიძე (სამტრედია)
საუკეთესო უნივერსალი – ლევან კასრაძე (TTC)
საუკეთესო ბომბარდირი – დავით დარჩია (ბორჯომი)
საუკეთესო მენეჯერი – შ.პ.ს ბათუმის წყალის გენერალური დირექტორი, ჯანსუღ ვარშალომიძე
ჩემპიონატის ორგანიზებაში და მინი-ფეხბურთის განვითარებაში შეტანილი განსაკუთრებული წვლილისთვის, დაჯილდოვდა – აჭარის მინი ფეხბურთის ფედერაციის პრეზიდენტი, ვახტანგ ბარაბაძე.

მინი-ფეხბურთის საქართველოს ჩემპიონატი სპორტულ ფესტივალ „საქართველო 2014“-ის ფარგლებში ჩატარდა, რომლის ინიციატორი სპორტისა და ახალგაზრდობის საქმეთა სამინისტროა. ფესტივალი მაისის ბოლოს დაიწყო და სამ სპორტის სახეობას მოიცავდა მინი-ფეხბურთს, სამოყვარულო ხელბურთს და მაგიდის ჩოგბურთს. „სპორტი ყველასათვის“ გენერალური მდივანი ზაალ ჩიტალაძე იმედოვნებს, რომ სამომავლოდ ფესტივალს ფრენბურთი, ბანბიქტონი და სხვა მასობრივი სპორტის სახეობები დაემატება. მისი შეფაებით ფესტივალმა დადებითად ჩაიარა.

„ამ ღონისძიებამ დაგვანახა, რომ მოყვარულ სპორტსმენებს სურვილი აქვთ ჩართული იყვნენ სამოყვარულო მინი-ფეხბურთში. ვფიქრობთ, რომ უფრო მეტი გუნდი იყოს სამომავლოდ და უფრო მასობრივი გახდეს ეს ღონისძიება. ვისურვებდი ფინალში ბათუმის გუნდს მიეღო მონაწილეობა და მეტი მაყურებელი ყოფილიყო. ვიმედოვნებთ, რომ ბათუმში გუნდები შენარჩუნდება, უფრო ივარჯიშებენ და უფრო კონკურენტუნარიანი იქნებიან მომავალ ჩემპიონატზე“- ამბობს ზაალ ჩიტალაძე.

ზაალ ჩიტალაძე დასძენს, რომ სამომავლო გეგმაა მინი-ფეხბურთში საქართველოს ეროვნული ნაკრების ჩამოყალიბება და ევროპისა და მსოფლიოს ჩემპიონატზე მონაწილეობა.







ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი