Batumelebi | სამი ბრინჯაო და მოსადის ინსტრუქტორი ბათუმში სამი ბრინჯაო და მოსადის ინსტრუქტორი ბათუმში – Batumelebi
ნეტგაზეთი • RU

სამი ბრინჯაო და მოსადის ინსტრუქტორი ბათუმში

სტამბულში გამართულ მეოთხე მსოფლიო ჩემპიონატზე შოტოკან კარატეში 45 ქვეყნის 3000-მდე სპორტსმენი მონაწილეობდა. საქართველოს ნაკრები ტურნირზე 110 სპორტსმენით წარსდგა, რომელთა შორის ხუთი მებრძოლი ბათუმიდან იყო (მწვრთნელი გოჩა სურმანიძე).




საერთო ჯამში საქართველოს ნაკრებმა 11 ოქროს, 12 ვერცხლისა და 27 ბრინჯაოს მედალი მოიპოვა. ბათუმელთაგან ბრინჯაოს მედლის მფლობელები გახდნენ: გია დიასამიძე (14-15 წლიანები, -70 კგ), ლაშა ვარშანიძე (18-34 წლიანები, 70 კგ) და ნანა მჟავანაძე (16-17 წლიანები, 55 კგ). მათ საპრიზო ადგილები კუმიტეში (ორთაბრძოლა) მოიპოვეს. საერთო ჯამში საქართველოს ნაკრები გუნდურ პირველობაში მხოლოდ აზერბაიჯანს ჩამორჩა და მეორე ადგილი დაიკავა, მესამეზე თურქეთის ეროვნული გუნდი გავიდა.

გოჩა სურმანიძე: ტურნირით კმაყოფილი ვარ, ხუთი სპორტსმენიდან სამ მედალს რომ მოიპოვებ, თან მსოფლიო ჩემპიონატზე, ურიგო ნამდვილად არ უნდა იყოს. რაც შეეხება კიდევ ერთ სიახლეს, ზაფხულში სემინარების ჩასატარებლად ვაპირებთ გაბი მიხაელის მოწვევას. გაბი მიხაელი გახლავთ მსოფლიო უსაფრთხოების აკადემიის მთავარი ინსტრუქტორი, ისრაელის დაზვერვის ინსტრუქტორი და მსოფლიოს კრავ-მაგას (თავდაცვისა და თავდასხმის სისტემა, რომელსაც გამოიყენებენ სპეცსამსახურები) ერთ-ერთი დამფუძნებელი.

ნეტგაზეთის მასალების სხვა გამოცემებში გადაბეჭდვის წესი
ირაკლი დარცმელიძე