სპორტი

რა პრობლემებია აჭარის რაგბში? – „ბათუმი“ ბრალდებებს პასუხობს

10.12.2012 • 2215
რა პრობლემებია აჭარის რაგბში? – „ბათუმი“ ბრალდებებს პასუხობს

დავით მესხიძე: ჩვენ ყოფილი სპორტსმენები ვართ და სპორტში არსებულ მდგომარეობაზე გული შეგვტკივა. ავიღოთ რაგბი, კალათბურთი, ფეხბურთი… დიდი პოტენციალი გააჩნია აჭარას, მაგრამ ეს რატომღაც შედეგებზე არ აისახება. თუმცა ამ შემთხვევაში მხოლოდ რაგბზე ვისაუბრებთ. ვთვლით, რომ რაგბისთვის გამოყოფილი თანხები არამიზნობრივად იხარჯება და ასეთი სავალალო შედეგიც სწორედ ამან განაპირობა.

 

 

არამიზნობრივ ხარჯვაში რას გულისხმობთ?

 

 

– ავიღოთ თუნდაც ის ფაქტორი, რომ სარაგბო გუნდი „ბათუმი“ ძირითადად ჩამოყვანილი მოთამაშეებითა არის დაკომპლექტებული, მათ საკმაოდ სოლიდურ ხელფასებს უხდიან, მაგრამ შედეგი არ ჩანს, გუნდს ჩემპიონატში მხოლოდ სამი მოგება აქვს. არაფერი დაშავდება იმით, თუ გუნდის ძირითად ბირთვს სწორედ ბათუმელებით დავაკომპლექტებთ და დარწმუნებულები ვართ, რომ ისინი გაცილებით მეტი შემართებით ითამაშებენ და შედეგიც გაუმჯობესდება.

 

 

გუნდის მოთამაშეების არჩევა ხომ მწვრთნელის პრეროგატივაა? ის წყვეტს, ვინ უნდა მიიწვიოს და ათამაშოს

 

 

– გეთანხმებით და სწორედ ეს არის პრობლემა. კახა კუნჭულიას შერჩეული გუნდი შედეგს ვერ აჩვენებს.

 

 

მინდია ღლონტი
მინდია ღლონტი

მინდია ღლონტი: „დელფინები“ პირველ ლიგაში ასპარეზობს. გვყავს ისეთი მორაგბეები, რომლებიც უმაღლეს ლიგაშიც შეძლებენ მაღალ დონეზე თამაშს, მაგრამ რატომღაც ჩვენ მიმართ ყურადღებას არ იჩენენ. არავითარი პრობლემა არ გვაქვს ჩამოყვანილ ბიჭებზე, ჩვენ ერთი დიდი ოჯახი ვართ, მაგრამ დარწმუნებულები ვართ, რომ ბათუმელებს გაცილებით მეტი სარგებლის მოტანა შეუძლიათ გუნდისთვის. არის მეორე ფაქტორიც, ჩამოყვანილ მოთამაშეს რომ ხელფასს უხდიან, დაახლოებით 2500-2800 ლარს, იმ თანხით შეიძლება ორ ბათუმელს გადაუხადონ. თანხის ნაწილი შეიძლება და აუცილებელიცაა, ბათუმელი მორაგბეების ახალი თაობის აღზრდას მოხმარდეს, რაც ისევ ჩვენს რეგიონს გამოადგება.

 

 

იქნებ უკეთესი იქნებოდა ამ საკითხით უშუალოდ ბათუმის ხელმძღვანელობისთვის მიგემართათ?

 

 

– გვქონდა ერთობლივი შეხვედრა „ბათუმის“, „დელფინების“, აჭარის რაგბის კავშირის ხელმძღვანელობას და დასავლეთ საქართველოს რაგბის კურატორს, რომელიც ფედერაციის ამჟამინდელი ხელმძღვანელის, რობერტ ჩხაიძის (ბათუმის ყოფილი მერი) კაბინეტში შედგა. შევთავაზეთ, ჩვენი ძალები გაგვეერთიანებინა და ორი კარგი გუნდი ჩამოგვეყალიბებინა, რომლებიც როგორც უმაღლეს, ასევე პირველ ლიგაშიც ღირსეულად წარსდგებოდნენ. გარდა ამისა, აუცილებელია გვყავდეს A და B ლიგის გუნდები, ასევე საფესტივალო ასაკის (ბავშვთა რაგბი) გუნდები, საერთო ჯამში კი გამოვა დიდი სარაგბო აკადემია, როგორიც ეროვნული ჩემპიონატის წამყვან გუნდებშია, თუმცა ამ თემაზე საუბარიც არ ისურვეს. ეს კი არადა, პირველი ლიგისთვის ანუ ჩვენთვის, შეჯიბრისთვის 2500 ლარი ვერ გამონახეს. საქართველოს რაგბის კავშირის ხელმძღვანელს, გია ნიჟარაძეს მივმართეთ და დაგვპირდა, რომ ბათუმში გვესტუმრებოდა და ადგილზე გაეცნობოდა ვითარებას. უბრალოდ გული გვტკივა, რომ აჭარას, რომელსაც სარაგბო ტრადიციები გააჩნია, დღეს ასეთი სუსტი გუნდი ჰყავს. ერთი მაგალითი მინდა მოგიყვანოთ: ქუთაისის „აია“, რომელიც დღეს ეროვნული ჩემპიონატის ფავორიტია, ანალოგიური პრობლემის წინაშე აღმოჩნდა. გაერთიანდა ყველა, ვისაც რაგბზე გული შესტკივა, ძველი ხელმძღვანელობა, რომელმაც ვერ გაამართლა, წავიდა. ახლები მოვიდნენ ახალი გეგმებით და დღეს „აია“ თუ რა გუნდიცაა, ყველას კარგად მოეხსენება.

 

 

თქვენც ხომ არ გეგმავთ ხელმძღვანელობის შეცვლას?

 

 

– ეს მხოლოდ ჩვენი გადასაწყვეტი არ არის. დღეს აჭარის რაგბის კავშირს რობერტ ჩხაიძე ხელმძღვანელობს. ვფიქრობთ, რომ როდესაც ერთი ვერ ამართლებს, უნდა წავიდეს და ასპარეზი მეორეს დაუთმოს, თუმცა ეს არ ნიშნავს, რომ საერთოდ წავიდეს რაგბიდან.

 

 

თქვენ აღნიშნეთ, რომ არიან ბიჭები, რომლებიც უმაღლეს ლიგაში თამაშს შეძლებენ და გუნდს გააძლიერებენ

 

 

– დიახ, და არა მარტო ისინი, ვინც ამჟამად ბათუმშია. ზოგიერთი თბილისში თამაშობს, ზოგიერთი – საზღვარგარეთ. ირაკლი ნინიძე, დავით გუგუშვილი, გიორგი თხილაიშვილი, მამუკა და ნიკა ნინიძეები, აჩიკო ალიქაძე და სერგო მოქია, რომელსაც ველაპარაკე და თანახმაა ბათუმში დაბრუნდეს.

 

 

ბათუმელები  „ბათუმის მთავარ მწვრთნელს კახა კუნჭულიას დაუკავშირდა.

 

კახა კუნჭულია
კახა კუნჭულია

კახა კუნჭულია: ჩვენ ვართ კლუბი, რომელიც 2000 წელს „ბათუმი ელიტის“ სახელით ჩამოყალიბა, შემდეგ გადაკეთდა აიპ „ბათუმი XV“-ად, რომელმაც 2009 წელს უმაღლესი ლიგის ფინალი ითამაშა და მეორე ადგილზე გავედით. 2010 წელს გუნდი ათმა კაცმა დატოვა, რამაც ჩვენი პირველ ლიგაში დაქვეითება განაპირობა. მოგვიანებით ჩვენზე პატრონაჟი ბათუმის მერიამ აიღო საკუთარ თავზე და დღეს ის შპს „სარაგბო კლუბ ბათუმის“ 100-პროცენტიან წილს ფლობს. პირველ ლიგაში 14-დან 14-ივე თამაში მოვიგეთ და უმაღლეს ლიგაში დავბრუნდით და სწორედ ამის შემდეგ, გუნდის გაძლიერების მიზნით დავიმატეთ მორაგბეები, მათ შორის საქართველოს ნაკრების წევრი გიორგი ბეგაძე.

წელს უმაღლეს ლიგაში დარჩენაზე ვიბრძვით და დარწმუნებულები ვართ, დავრჩებით კიდეც. ჩვენს უშუალო კონკურენტებს მოვუგეთ. ბევრი მოთამაშე დაგვემტვრა და უმეტესობა ბათუმელი, მათ შორის გუნდის წამყვანი მოთამაშეები გიორგი სვინტრაძე, გიორგი გოგიტიძე, აჩიკო მეგრელიძე, ასევე საქართველოს ნაკრების წევრი ირაკლი გიორგაძე და სხვები. ფაქტობრივად, 18 კაცით გვიწევს ასპარეზობა. რაც შეეხება მოგებებს, ქვიშის რაგბის მოქმედი ჩემპიონები ვართ, ასევე, შვიდკაცა რაგბის ყველა ფინალი გვაქვს ნათამაშევი.

ბავშვთა რაგბზეც გეტყვით, გვყავს ორი გუნდი, ერთი B ლიგაში თამაშობს, მეორე – საფესტივალო ასაკში. მომავალი წლიდან A ლიგის გუნდიც გვეყოლება.

რაც შეეხება გაერთიანებას, „დელფინების“ ყველა თამაშს ვესწრები. რომ დამენახა ისეთი მოთამაშე, რომელიც ჩვენს ბიჭებს რეალურ კონკურენციას გაუწევდა, ავიყვანდი გუნდში აუცილებლად. ნუ დაავიწყდებათ, რომ „დელფინების“ 40 პროცენტი „ბათუმი ელიტის“ აღზრდილია. არასწორად მიმაჩნია ის ფაქტიც, რომ ბათუმის გუნდში მარტო ბათუმელები უნდა თამაშობდნენ, თუმცა ეს არ ნიშნავს იმას, რომ ადგილობრივ კადრებს ყურადღებას არ ვაქცევთ. როდესაც ანტალიაში ვიყავით შეკრებაზე, ყველა ის მორაგბე, მათ შორის ის ბავშვებიც წავიყვანე, რომლებსაც ჩვენი კლუბისთვის სარგებლის მოტანა შეუძლია.

მათ მიერ ჩამოთვლილი მოთამაშეები, რომლებიც თითქოსდა ბათუმში დაბრუნდებიან, კარგ კლუბებში თამაშობენ და ისეთი ანაზღაურება აქვთ, რომ აქ ვერ შევთავაზებთ. მაგალითისთვის ალიქაძეც საკმარისია, რომელიც საფრანგეთში თამაშობს და თავისი რეგიონის ყველაზე მაღალანაზღაურებადი მორაგბეა. ასევეა გუგუშვილიც, რომელიც პოლონეთში თამაშობს.  თხილაიშვილმა ხუცუბანში დაიწყო თამაში, შემდეგ „ბათუმი ელიტის“ წევრი გახდა და ფინალიც ითამაშა, დღეს ის ერთ-ერთი წამყვანი მორაგბეა. ირაკლი ნინიძე, რომელიც ჩვენი წამყვანი მოთამაშე იყო, „არმიამ“ მიიწვია და მე ვიყავი პირველი, ვინც მის გადასვლას მხარი დაუჭირა. განა იმიტომ რომ გუნდში არ მჭირდებოდა, უბრალოდ მას უკეთესი პირობები შესთავაზეს და რად უნდა დამეკავებინა?!

და ბოლოს, ჩვენ სიტყვებით არ ვთამაშობთ, ჩვენ რაგბს ვთამაშობთ, დავნიშნოთ შეხვედრა „ბათუმსა“ და „დელფინებს“ შორის, იქ გამოჩნდება ყველაფერი.

გადაბეჭდვის წესი


ასევე: