„ლუკა პოლიტპატიმარია“ – მოსამართლეს სტუდენტებმა დაფაზე წარწერა დაახვედრეს

„ლუკა ნაცვლიშვილი პოლიტპატიმარია“ – ეს წარწერა დღეს, 2 ივნისს, ბათუმის შოთა რუსთაველის უნივერსიტეტის იმ აუდიტორიის დაფაზე დატოვეს სტუდენტებმა, სადაც მოსამართლე გულიკო კაჟაშვილი ლექციას ატარებს.

გულიკო კაჟაშვილი სწორედ ის მოსამართლეა, რომელმაც 19 წლის სტუდენტს, ლუკა ნაცვლიშვილს 12-დღიანი ადმინისტრაციული პატიმრობა შეუფარდა 27 მაისს.

ბსუ-ს მაგისტრატურის სტუდენტმა, არჩილ ბერიძემ, რომელიც ბათუმში მიმდინარე საპროტესტო აქციების აქტიური მონაწილეა, დღეს, 2 ივნისს, დილით, ფეისბუქის საკუთარ გვერდზე პირდაპირ ჩართვაში თქვა, რომ მას შემდეგ, რაც დაფაზე წარწერა დატოვეს, რამდენიმე სტუდენტმა პროტესტის ნიშნად დატოვა გულიკო კაჟაშვილის ლექცია.

მან ჩართვაში აჩვენა ისიც, რომ ლექციას მოსამართლე კაჟაშვილი დაფაზე სწორედ ამ წარწერის ფონზე ატარებდა.

„უნივერსიტეტში მოვედი, დაცვა შემოგვყვა ამ უნივერსიტეტის სტუდენტები არ ხართო, გულიკო კაჟაშვილს მოუწია სირცხვილის დერეფნის გავლა და ისე შესვლა აუდიტორიაში, რამდენიმე სტუდენტმა პროტესტის ნიშნად ლექცია დატოვა, დაფაზე აწერია – „ლუკა ნაცვლიშვილი პოლიტპატიმარია“ და ამის ფონზე ატარებს ლექციას.

…ამ ადამიანს ლექციების ჩატარება მოუწევს ამ წარწერის ფონზე, არ ვიცი მისთვის მორალურად რამდენად შემაწუხებელია, მაგრამ მგონია, რომ სადღაც შეწუხდა,“ – თქვა არჩილ ბერიძემ პირდაპირ ჩართვაში.

არჩილ ბერიძესთან დღეს უნივერსიტეტის დაცვის თანამშრომლებიც მივიდნენ და მას რექტორთან გაყოლა სთხოვეს, რათა დაეზუსტებინათ, არჩილ ბერიძე ნამდვილად სტუდენტი იყო თუ არა, თუმცა სტუდენტმა დაცვის თანამშრომლებს უთხრა, რომ თუ სურვილი ჰქონდა, რექტორს შეეძლო თავად მისულიყო მასთან.

„სამარცხვინოა, როცა აქციაზე მყოფ სტუდენტებს უნივერსიტეტში შემოსვლის შემდეგ, დაცვას აგდებენ ისეთ მდგომარეობაში, რომ მომიტინგე სტუდენტებს სდიონ კუდში. როგორც ყველა დიქტატურა მთავრდება, „ოცნებაც“ ასე დამთავრდება,“ – თქვა არჩილ ბერიძემ.

მოსამართლე გულიკო კაჟაშვილმა წელს უკვე მეორედ შეუფარდა ლუკა ნაცვლიშვილს 12-დღიანი ადმინისტრაციული პატიმრობა.

ფოტოზე: 2 ივნისი, მოსამართლე გულიკო კაჟაშვილი ლექციაზე – დაფაზე წარწერაა: „ლუკა ნაცვლიშვილი პოლიტპატიმარია“. 

ამავე თემაზე: 

ვინ არის მოსამართლე გულიკო კაჟაშვილი, რომელმაც ლუკა ნაცვლიშვილი მეორედ დააპატიმრა