9 აპრილს, თბილისში, რუსთაველის გამზირზე, მოქალაქეებმა ხეებზე ლექსები გააკრეს. ასეთივე აქტით მიაგეს პატივი 9 აპრილს დაღუპული ადამიანების ხსოვნას მოქალაქეებმა და პოეტებმა 1989 წელს, როცა სპეციალურად ამ დღისთვის დაწერილი ლექსები, გააკრეს ჭადრის ხეებზე.
ამჯერად რუსთაველის გამზირზე მოქალაქეებმა გააკრეს ლექსები ძველი და ახალი თაობის პოეტების სიტყვებით, ასევე ქუჩაში გაჟღერებული ლოზუნგებით. „ეს აქტი ნიშნავს, რომ მოქალაქეებს გვახსოვს და არ გვინდა განმეორდეს “, – ამბობენ ისინი.
8 აპრილს, თბილისში 9 აპრილის მემორიალთან პოლიტპატიმრების ოჯახის წევრებმა და მოქალაქეებმა ღამე გაათენეს და კვლავ ადგილზე რჩებიან. დილიდან იქ სიტუაცია რამდენჯერმე დაიძაბა მას შემდეგ, რაც იქ მივიდნენ ირაკლი კობახიძის სიძე, აფხაზეთის მთავრობის მინისტრი დავით ფაცაცია და გლდანის მაჟორიტარი კოსტა ზარნაძე. მათ გამოჩენამდე მემორიალთან “ოცნების” მხარდამჭერებიც მივიდნენ.
სოლიდარობის ნიშნად 9 აპრილის მემორიალთან ღამე გაათენეს მოქალაქეებმა ზუგდიდშიც. რამდენიმე საათის წინ მათ საპოლიციო ძალები დაუპირისპირდნენ და ძალის გამოყენებით დაატოვებინეს ტერიტორია. სწორედ ამ დროს მემორიალთან მივიდნენ ადგილობრივი ჩინოვნიკები. ერთი ადამიანი დაშავდა, რომელიც სავარაუდოდ ტვინის შერყევით გადაყვანილია ჰოსპიტალში.
დღეს, 9 აპრილის მემორიალთან დილის 8 საათიდან შეიკრიბნენ პროევროპული აქციების მონაწილეებიც. „არ ვაპირებთ, ფარისევლებს და რუსული მთავრობის წარმომადგენლებს დავუთმოთ ეს ისტორიული დღე“ – აცხადებენ აქტივისტები. დღეს აქ „ოცნების“ ადგილობრივი ლიდერები არ გამოჩენილან.
