მედიის ადვოკატირების კოალიცია ეხმაურება ონლაინ გამოცემა „აჭარა თაიმსისა” და საზოგადოებრივი მაუწყებლის ჟურნალისტების წინააღმდეგ განხორციელებულ ძალადობას და მათი პროფესიული საქმიანობის უკანონოდ ხელშეშლის შემთხვევას.
საქმე შეეხება 20 თებერვალს მომხდარ შემთხვევას, როცა ბათუმში, „ოცნების ქალაქში“ გამოცემა “აჭარა თაიმსის“ დირექტორს, ჟურნალისტ სულხან მესხიძეს და საზოგადოებრივი მაუწყებლის გადაცემა „გამომძიებელი რეპორტიორის“ ჟურნალისტ, ლია ტოკლიკიშვილს, „ქართული ოცნების” აქტივისტები დაუპირისპირდნენ.
„ეს არ არის პირველი შემთხვევა, როდესაც ჟურნალისტები მსგავსი ძალადობის მსხვერპლნი ხდებიან. 28 ნოემბრიდან დღემდე მედიის წინააღმდეგ 150-მდე ინციდენტი დაფიქსირდა, თუმცა არცერთ შემთხვევაში დამნაშავე პირები არ დასჯილან.
„აჭარა თაიმსი“ განსაკუთრებით ხშირად ხდება მსგავსი თავდასხმების სამიზნე, რაც მიუთითებს კრიტიკული მედიის მიზანმიმართულ დევნაზე.
მედიაზე განხორციელებული ეს თავდასხმები არის “ქართული ოცნების” მიერ გატარებული პოლიტიკის ნაწილი, რომელიც მიზნად ისახავს კრიტიკული აზრის ჩახშობას და ინფორმაციის თავისუფალი გავრცელების შეზღუდვას. რეჟიმის მიერ მედიის წინააღმდეგ მიმართული მტრული რიტორიკა და სამართალდამცავი ორგანოების უმოქმედობა ქმნის გარემოს, სადაც ჟურნალისტებზე ძალადობა დაუსჯელი რჩება.
მედიის ადვოკატირების კოალიცია სოლიდარობას უცხადებს დამოუკიდებელ ჟურნალისტებს. თავისუფალი მედია დემოკრატიის ქვაკუთხედია და მისი შეზღუდვა პირდაპირ ეწინააღმდეგება საქართველოს ევროპულ მისწრაფებებს“ – წერს კოალიცია.
ამავე თემაზე:
„ოცნების ქალაქში“ 2 ბავშვი წყლით სავსე თხრილში ჩავარდა და დაიღუპა
