მოსამართლე ალექსანდრე გოგუაძემ 500-500 ლარით დააჯარიმა ბათუმის საპროტესტო აქციის 12 მონაწილე „ქუჩის გადაკეტვის საქმეზე“.
საუბარია 2024 წლის 16 დეკემბრის შემთხვევაზე – კოკიპირული წვიმის მიუხედავად, მოქალაქეები აქციაზე მაინც შეიკრიბნენ, ბათუმის პოლიციის უფროსმა, ირაკლი დგებუაძემ მათ ტროტუარზე გადასვლა მოსთხოვა.
ამ საქმეზე მოსამართლემ დღეს, 24 იანვარს დააჯარიმა: გოგიტა სოლომონიძე, ირაკლი ჯორბენაძე, აზა გაბუნია, თორნიკე კაკალაძე, ლარა ქარცივაძე, ირმა კომახიძე, დარიკო ჩიტაძე, ირმა ზოიძე, ვაჟა დარჩია, ელგუჯა ბაგრატიონი, ნიკოლოზ მირცხულავა, ლევან გორგილაძე.
პასუხისგებაში მიცემული პირების ნაწილი მოსამართლის გადაწყვეტილების გამოცხადებას არ დასწრებია. ეს საქმე ალექსანდრე გოგუაძემ რამდენიმე დღის წინ განიხილა, დღეს კი, გადაწყვეტილებები გამოაცხადა.
მოსამართლემ უმრავლეს შემთხვევაში არ დააკმაყოფილა მოწმეების გამოკითხვაზე შუამდგომლობა. ისინი დაადასტურებდნენ პირიქით, პოლიციამ როგორ დაარღვია დემონსტრანტრების გამოხატვის თავისუფლება. მოსამართლემ მიიჩნია, რომ მოწმეების მოსმენა სასამართლო პროცესების გაჭიანურებას გამოიწვევდა.
„ისეთივე გადაწყვეტილება მიიღეთ, როგორი ოქმიც შედგა,“ – მიმართა მოსამართლეს ირმა კომახიძემ, რომელმაც მოსამართლის გადაწყვეტილება მოისმინა. ამ შემთხვევაზე სასამართლომ მოწმის ჩვენება მოისმინა. მოწმემ მოსამართლეს სატელეფონო მიმოწერაც აჩვენა, რაც ადასტურებდა იმას, რომ ირაკლი დგებუაძის მოთხოვნის გაჟღერების დროს ირმა კომახიძე აქციაზე საერთოდ არ იყო.
„მაგრამ შემდეგაც მოგიწოდებდნენ სამართალდამცველები აქციის მონაწილეებს,“- უთხრა მოსამართლემ ირმა კომახიძეს.
„სხვას არც ველოდი,“- მოკლე რეპლიკით შემოიფარგლა აზა გაბუნია, რომელმაც ასევე დარბაზში მოისმინა მოსამართლის გადაწყვეტილება.
ამავე თემაზე:
„სასამართლომ არ უნდა აუნთოს მწვანე შუქი რეპრესიებს“ – 16 დეკემბრის აქციის საქმე ბათუმის სასამართლოში
