ბათუმში ძლიერი წვიმის შედეგად მცირე მეწყრული პროცესები დაფიქსირდა, დაიტბორა ქალაქის ქუჩები, დაზიანდა მცენარეები.
ბათუმის მერიის ცნობით, 28 ნოემბრის ღამის მონაცემებით, მერიაში დაახლოებით 90 მისამართიდან შევიდა მოქალაქეების განცხადება მიწის ნაკვეთებისა და ეზოების დატბორვასთან დაკავშირებით.
„თითოეულ ლოკაციაზე მიმდინარეობს ამოტუმბვითი სამუშაოები, ინტენსიურად იწმინდება ზღვაში გამსვლელი არხები. მობილიზებულია სპეცტექნიკა და განსაკუთრებულ რეჟიმში მუშაობს ყველა მუნიციპალური სამსახური.
ამავდროულად, მუდმივმოქმედი კომისიის ფარგლებში, ყველა ჩვენს თანამოქალაქეს, ყველა ბათუმელს, რა თქმა უნდა, აუნაზღაურდება და დაუკმაყოფილდება ის მოთხოვნები და ხარჯები, რაც სტიქიის შედეგად მიადგება“ – აქვეყნებს მერია ბათუმის მერის, არჩილ ჩიქოვანის კომენტარს.
ბათუმში მეორე დღეა გადაუღებლად წვიმს. სინოპტიკოსების ცნობით, აჭარაში ხვალ, დილიდან გამოიდარებს.
