„შავი ორშაბათი საქართველოში: პოლიცია და სპეცრაზმი იცავენ კარებს, რომლის მიღმაც „ქართული ოცნების მონები“ კლავენ ჩვენს კონსტიტუციას და მასხრად იგდებენ ჩვენს პარლამენტს“ – ასე ეხმიანება საქართველოს პრეზიდენტი, სალომე ზურაბიშვილი X-ზე საქართველოს მე-11 მოწვევის პარლამენტის პირველ სხდომას, რომელსაც მხოლოდ „ოცნება“ ესწრებოდა.
დღეს, 25 ნოემბერს, „ქართულმა ოცნებამ“ პარლამენტის 150 წევრის უფლებამოსილება ცნო.
კონსტიტუციონალისტების განმარტებით, ეს პროცედურაც და გადაწყვეტილებაც არაკონსტიტუციურია. შესაბამისად, არაკონსტიტუციურია პარლამენტიც.
კონსტიტუციონალისტების განმარტებით, იქამდე, სანამ საკონსტიტუციო სასამართლო არ მიიღებს გადაწყვეტილებას პრეზიდენტის სარჩელზე, პარლამენტის შეკრება და დეპუტატების უფლებამოსილების ცნობა უკანონოა.
პრეზიდენტის სარჩელი საკონსტიტუციოში 20 ნოემბერს დარეგისტრირდა, თუმცა გამწესრიგებელი სხდომა ამ დრომდე არ გამართულა.
დღეს, 25 ნოემბერს, სხდომის პარალელურად, პარლამენტის მიმდებარე ტერიტორიაზე აქცია იმართება. მოქალაქეთა ნაწილმა პარლამენტთან ღამე გაათენა, ნაწილი კი დილით მივიდა. პროტესტს უერთდებიან მოქალაქეები რეგიონებიდანაც.
