„წაბრძანდით, ნაციონალების შეხვედრაზე დადექით… თქვენ ხართ ჩვეულებრივი მიყიდული, გაყიდული…,“ – ასე მიმართა ხარაგაულის მერმა, კობა ლურსმანაშვილმა დამოუკიდებელი მედია ორგანიზაცია „ჩემი ხარაგაულის“ დამფუძნებელს ლაურა გოგოლაძეს.
შემთხვევა გუშინ, 16 ოქტომბერს, ხარაგაულში მოხდა.
„ქართულ ოცნებას“ ხარაგაულის ცენტრში ამომრჩეველთან შეხვედრა ჰქონდა დაგეგმილი, რომელზე დასწრების უფლებაც ჟურნალისტებს არ მისცეს.
2024 წლის საპარლამენტო არჩევნებზე სახელისუფლებო პარტია ამომრჩეველთან შეხვედრებს ფარულად მართავს და ცდილობს შეზღუდოს მასზე მედიის დასწრება.
კობა ლურსმანაშვილი გარდა იმისა, რომ ხარაგაულის მერია, „ქართული ოცნების“ ხარაგაულის რაიონული ორგანიზაციის ხელმძღვანელის პოსტსაც იკავებს.
ლურსმანაშვილმა ჟურნალისტებს საჯარო შეხვედრაზე დასწრების უფლება არ მისცა, ამასთან „ჩემი ხარაგაულის“ დამფუძნებელსა და მთავარ რედაქტორს დეკლარაციის შევსება და ფინანსების გამჭვირვალობა მოთხოვა.
ლაურა გოგოლაძემ, მერს შეახსენა, რომ მედია ორგანიზაციის ფინანსები გამჭვირვალეა, ყველა სახელმწიფო უწყება, რომელსაც კონტროლი ევალება, დოკუმენტაციაზე ხელი მიუწვდება.
„ჩვენ ამომრჩეველს ველაპარაკებით, რა გინდათ თქვენ?“ – ხარაგაულის მერს მიეხმარა მერის მოადგილე ვარლამ ჭიპაშვილი. მედიას მუშაობაში ხელი ვარლამ ჭიპაშვილმაც შეუშალა.
„ერთია, რომ ჟურნალისტურ საქმიანობაში შეგვიშალა ხელი, მაგრამ ამაზე უფრო მნიშვნელოვანი ისაა, რომ არ მოგვეცა შეხვედრაზე დასწრების საშუალება. ჩვენ ვერ ვუსმენთ რა დაპირებებს აძლევენ მოქალაქეებს სახელისუფლებო პარტიიდან, არ ვიცით დარბაზიდან შეკითხვები იყო თუ არა, ვერ ვგებულობთ რა საკითხები აწუხებთ მმართველი პარტიის შეხვედრაზე მისულ ამომრჩევლებს. მოქალაქეების, ადამიანების ხმა აღარ ისმის საერთოდ. აღარ გვესმის მმართველი პარტიის წარმომადგენლები რას ეუბნებიან ხალხს. შეხვედრების შემდეგ აქვეყნებენ მხოლოდ ფოტოებს. მაკონტროლებელი მედიის არსებობა უქმნით დისკომფორტს,“ – უთხრა „ბათუმელებს“ მედიაგამოცემა „ჩემი ხარაგაულის“ დამფუძნებელმა და მთავარმა რედაქტორმა ლაურა გოგოლაძემ.
ლაურა გოგოლაძის თქმით, ეს არ არის პირველი შემთხვევა, როდესაც მმართველი პარტიის წარმომადგენლები არ აძლევენ მედიას საშუალებას დაესწროს და გააშუქოს საჯარო შეხვედრები.
