ქართველი ფოტოგრაფების ნამუშევრების გამოფენა ნობელების მუზეუმში

ბათუმში, ძმები ნობელების სახელობის ბათუმის ტექნოლოგიურ მუზეუმში 2016 წლის 19-26 აგვისტოს გაიმართება გამოფენა სახელწოდებით – „სოხუმიდან ბათუმამდე და ქობულეთიდან ქუთაისამდე“.

გამოფენაზე წარმოდგენილი იქნება დიმიტრი ერმაკოვისა და ალექსანდრე როინიშვილის 120 ფოტო და ორი ფოტოალბომი ორიგინალი ფოტოებით. ფოტოებზე ასახულია საქართველოს იმდროინდელი ყოფაცხოვრება. გამოფენის მიზანია მუზეუმის პოპულარიზაცია და ტურისტების მოზიდვა.

როგორც ძმები ნობელების მუზეუმის მმართველი თამარ ორაგველიძე ორაგველიძე აღნიშნავს, ღონისძიება გაცოცხლებულია 1905 წლით დათარიღებული შავი ზღვისპირეთის მეგზურის მიხედვით, სადაც აღნიშნულია, თუ სად უნდა წასულიყვნენ ტურისტები, რა უნდა დაეთვალიერებინათ, სად უნდა დაესვენათ და ა.შ. ბათუმი, სოხუმი, ქუთაისი, ქობულეთი – ეს ქალაქები სწორედ ამ მეგზურშია დასახელებული, ამიტომაც ჰქვია გამოფენას „სოხუმიდან ბათუმამდე და ქობულეთიდან ქუთაისმდე“. ავტორი აღწერს შავიზღვისპირეთის სანაპიროს, როგორც კავკასიის მშვენიერ რივიერას, გამორჩეულად მდიდარი ბუნებით, სილამაზით და საოცარი კლიმატით. ბოტანიკურ ბაღს კი მოიხსენიებს, როგორც მაღალი კულტურის ნიმუშს.

აღნიშნულ გამოფენაში ნობელის მუზეუმის პარტნიორები არიან ნიკო ბერძენიშვილის სახელობის ქუთაისის ისტორიული მუზეუმი და ბათუმის ბოტანიკური ბაღი.

გამოფენა დღეს, 19 აგვისტოს, დღის პირველ საათზე გაიხსნება და დამთვალიერებელს მისი დათვალიერება 26 აგვისტომდე შეეძლება ძმები ნობელების მუზეუმში.