თბილისისა და ბათუმის საერთაშორისო აეროპორტებში ივლისში მგზავრთა რეკორდული მაჩვენებელი დაფიქსირდა – ინფორმაციას „ტავ ჯორჯია“ ავრცელებს.
კომპანიის ცნობით, მხოლოდ ივლისში, ბათუმის საერთაშორისო აეროპორტმა 147,584 მგზავრი გადაიყვანა, რომელიც 2023 წლის მონაცემებს 48% -ით აჭარბებს.
„მგზავრთა მომსახურების ბოლო რეკორდული მაჩვენებელი თბილისისა და ბათუმის აეროპორტებში 2018 წლის აგვისტოში დაფიქსირდა. თბილისში 461,161 ხოლო ბათუმში 121,295 მგზავრი. 2024 წლის ივლისის მონაცემებმა კი აღნიშნულ რეკორდულ მონაცემებს გადააჭარბა.
2005 წელს, ტავ ჯორჯიას საქართველოში ოპერირების დაწყებისას, თბილისის საერთაშორისო აეროპორტში მგზავრთნაკადის წლიური მაჩვენებელი 547,150, ხოლო ბათუმის აეროპორტში 2007 წლის (8 თვის მონაცემით) 39,762 მგზავრი იყო“ – აცხადებს კომპანია.
საქართველოს აეროპორტებში მგზავრთა ნაკადი მკვეთრად გაიზარდა მას შემდეგ, რაც რუსეთმა 2023 წლის მაისში საქართველოსთან პირდაპირ ფრენებზე შეზღუდვა მოხსნა.
საქართველოში, ბათუმისა და თბილისის აეროპორტებში რუსული ავიაკომპანიები: Red Wings-ი და „აზიმუტი“ ასრულებენ პირდაპირ რეისებს. ავიარეისების ნაწილი სეზონურია.
2024 წლის სტატისტიკური მონაცემების თანახმად, საქართველოში უცხო ქვეყნებიდან შემოსული მოქალაქეების მიხედვით, პირველ ადგილზე კვლავ რუსეთის ფედერაციაა.
2024 წელს, იანვრიდან ივნისის ჩათვლით, საქართველოში რუსეთიდან 720 142 მოქალაქე შემოვიდა.
ამავე თემაზე:
საქართველოში რუსეთიდან 720 142 პირი შემოვიდა – 6 თვის სტატისტიკა
