კავკასიის კვლევითი რესურსების ცენტრმა, CRRC-საქართველომ გამოაქვეყნა კვლევა „კავკასიის ბარომეტრი 2024“. ამ კვლევის მიხედვით საქართველოში გაზრდილია ევროკავშირში საქართველოს გაწევრიანების მხარდამჭერთა რაოდენობა.
კერძოდ, საერთო გამოკითხულთა 48% მყარად უჭერს მხარს საქართველოს ევროკავშირში გაწევრიანებას, ხოლო 22% უფრო უჭერს მხარს, ვიდრე არ უჭერს.
ახალი კვლევის მიხედვით გაზრდილია ნატოში შესვლის მსურველთა რაოდენობაც. გამოკითხულთა 37% სრულად უჭერს მხარს საქართველოს შესვლას NATO-ში. „უფრო ვუჭერ მხარს, ვიდრე არ ვუჭერ“ – ეს პასუხი გამოკითხულთა 20%-მა გასცა.
წინა კვლევა CRRC-საქართველომ 2021 წელს ჩაატარა.
მაშინ საქართველოს ევროკავშირში გაწევრიანებას მხარს გამოკითხულთა 34% უჭერდა სრულად, ხოლო ნატოში გაწევრიანებას 31%.
2024 წლის „კავკასიის ბარომეტრი“ საქართველოში ჩატარებული გამოკითხვის მე-12 ტალღას წარმოადგენს. კვლევის ფარგლებში 1 509 რესპონდენტი გამოიკითხა. მაქსიმალური ცდომილების ზღვარი 3%-მდე მერყეობს. შედეგები მთელი ქვეყნის, ასევე დედაქალაქის, სხვა ქალაქებისა და სოფლის ტიპის დასახლებების წარმომადგენლობითია და არ მოიცავს ოკუპირებულ ტერიტორიებს.
