„აირჩიე ევროპა“ – დღეს, 11 ივლისს, ამ სახელწოდებით დაფუძნდა ახალი მოძრაობა, რომლის მიზანია დაიცვას საქართველოს ევროპული მომავალი, ქვეყნის დამოუკიდებლობა და თავისუფლება.
ახალ მოძრაობაში სხვადასხვა სფეროში წარმატებული ადამიანები არიან გაერთიანებული. როგორც მოძრაობის ერთ-ერთმა დამფუძნებელმა, ხათუნა ლაგაზიძემ განაცხადა, „ვისაც დამოუკიდებელ საქართველოში ცხოვრება უნდა, ირჩევს ევროპას“.
„შეჩერდა ევროკავშირში გაწევრიანების პროცესი, ნატოს სამიტის დეკლარაციაში საქართველოსთან პარტნიორობაზე აღარ არის საუბარი. ვკარგავთ ყველაფერს, რაზეც დღემდე დგას ქართული სახელმწიფო.
ჩვენი ვალია ევროპული აწმყო შევქმნათ აქ და დავაბრუნოთ ევროპული მომავლისთვის საქართველოდან გადახვეწილი ქართული ოჯახები“, – განაცხადა ხათუნა ლაგაზიძემ.
ლაგაზიძის განცხადებით, მოძრაობა „აირჩიე ევროპა“ 18 ივლისიდან იწყებს რეგიონებში გასვლას და 26 ოქტომბრამდე შეეცდება არჩევნებზე პროდასავლური ამომრჩევლის მაქსიმალურ მობილიზებას.
„კამპანიის სახელწოდება იქნება 100 დღე გამარჯვებამდე, რაშიც ჩართული იქნება საქართველოსა და მთელ მსოფლიოში მცხოვრები ქართველები. ხელოვანები, რეჟისორები, მსახიობები, მეცნიერები, ენერგეტიკოსები, ექიმები, ბიზნესმენები. ჩვენი ერთობა ღიაა ყველასთვის, ვინც საქართველოს ევროპულ მომავალს უჭერს მხარს. მოდით, მოიტანეთ თქვენი იდეები, გავაერთიანოთ ძალისხმევა და ერთობით გავიმარჯვოთ საქართველოს მომავლისთვის,“ – თქვა მოძრაობის თანადამფუძნებელმა პრეზენტაციაზე.
მოძრაობის პრეზენტაციას საქართველოს პრეზიდენტი დაესწრო.
„აირჩიე ევროპის“ დამფუძნებლები არიან: უსაფრთხოების ექსპერტი ხათუნა ლაგაზიძე, თსუ-ს პროფესორი, პოლიტიკის ანალიტიკოსი, ლელა ჯეჯელავა, ექსპერტი გიორგი რუხაძე, პოლიტიკურ მეცნიერებათა დოქტორი, საქართველოს უნივერსიტეტის პროფესორი, ლაშა ძებისაშვილი და ბიზნესმენი ივა ჭყონია.
