„ამ კანონის მიღება არის პროვოკაცია, მოსინჯვა ქართული საზოგადოების, თუ რამდენად არიან მზად დემოკრატიულ ქვეყანაში ცხოვრებისთვის,“ – რუსულ კანონზე გვესაუბრა პედაგოგი ვარლამ ხოზრევანიძე. ის ხულოში, სოფელ ბოძაურის საჯარო სკოლაში ასწავლის სამოქალაქო განათლებას და სპორტს.
„თუ მისი უზენაესობა ხალხი ღირსეულად დაიცავს თავის უფლებებს, მაშინ გამოცდა ჩაბარებული გვექნება და ღირსი ვიქნებით ღირსეულად ცხოვრების, თუ არა, მაშინ გვეყოლება ის ხელისუფლება, როგორებიც ვართ ჩვენ. ნახევრად დემოკრატიას დიქტატურა ჯობია. არჩევანი ხალხზეა. ხალხი თუ გამოვიდა ქუჩაში, ხელისუფლება უკან დაიხევს.
რაც შეეხება გამჭვირვალეობას, ის ხომ დემოკრატიის მთავარი პრინციპია, თუმცა არა მხოლოდ არასამთავრობოებისა და მედიისთვის, არამედ თავად ხელისუფლებისთვის.
ცდიან ხალხს – მაშინ არ გაუვიდათ და დემოკრატიამ გაიმარჯვა, ახლაც უნდა იყოჩაღოს ხალხმა,“ – გვითხრა ვარლამ ხოზრევანიძემ.
_____
- რა ხდება
მმართველმა პარტიამ მიცემული პირობა დაარღვია და ე.წ. რუსულ კანონის ჩაგდებიდან ერთი წლის შემდეგ კანონპროექტს ისევ აბრუნებს. „ქართული ოცნების” მიერ 3 აპრილს დარეგისტრირებულ კანონპროექტში „უცხოური გავლენის გამჭვირვალობის შესახებ“, გასულ წელს „ხალხის ძალის“ მიერ ინიციირებული და საპარლამენტო უმრავლესობის 76 დეპუტატის მხარდაჭერილი კანონისგან განსხვავებით, ტერმინი „უცხოური გავლენის აგენტი“ ჩანაცვლებულია „უცხოური ძალის ინტერესების გამტარებლით“.
კანონპროექტი გრანტის მიმღებ ორგანიზაციებს — „უცხოური ძალის ინტერესების გამტარებლის”, ხოლო მათ შორის აშშ-ს, ევროკავშირსა და საერთაშორისო ფონდებს, რომლებიც გრანტებს გასცემენ საქართველოში, „უცხოური ძალის“ სტატუსებს მიანიჭებს.
საქართველოს საერთაშორისო პარტნიორებმა, აშშ-ის, ევროკავშირისა და ევროპის საბჭოს ჩათვლით, შეშფოთება გამოთქვეს საქართველოს ხელისუფლების მიერ შარშან „უპირობოდ“ გაწვეული კანონპროექტის ხელახალი ინიციირების გამო.
