ნეტგაზეთი • RU

ბრალდებული, ვის გასამართლებასაც ხალხი ლინჩის წესით ითხოვდა

ორი კვირის წინ პოლიციამ გურიაში დააკავა დიმიტრი გ. მას ბრალი მცირეწლოვანზე განხორციელებულ მუქარაში ედება. იმავე დიმიტრი გ.-ს ქობულეთის მოსახლეობის ნაწილი პედოფილიაში ადანაშაულებს. მის საცხოვრებელ სახლთან მაისში ქობულეთელებმა რამდენჯერმე გამართეს საპროტესტო აქცია და ბრალდებულის ლინჩის წესით გასამართლება მოითხოვეს. აქციის მონაწილეებმა და ბავშვის დედამ მაშინ ჟურნალისტებს უთხრეს, რომ 61 წლის დიმიტრი გ.-მ 12 წლის გოგოსთან სექსუალური კავშირის დამყარება სცადა.

61 წლის დიმიტრი გ.-ს წინააღმდეგ მთავარი მოწმე 12 წლის გოგო იქნება, ასევე გოგონას 13 წლის ძმა, ვისაც პროკურატურამ უკვე მიანიჭა დაზარალებულის სტატუსი და ვის მიმართ განხორციელებულ მუქარასაც ედავება გამოძიება ბრალდებულს. საქმის პროკურორმა, გიორგი რამიშვილმა „ბათუმელებს“ უთხრა, რომ ვერ დადასტურდა თავდაპირველი ვერსია არასრულწლოვანთან ჩადენილ გარყვნილ ქმედებასთან დაკავშირებით:

„როდესაც ჩავატარეთ გამოძიება, არ დადასტურდა აღნიშნული ინფორმაცია. გოგონა ყვება, რომ მას ბრალდებული სთავაზობდა მანქანით წაყვანას და კანფეტების ყიდვას, ეს არ შეიძლება აღქმული იყოს გარყვნილ ქმედებად. ჩვენი მტკიცებით, ადგილი ჰქონდა მუქარას გოგონას ძმის მიმართ. მას ბრალდებული დაემუქრა, თუ შენს დას დაუშლი ჩემთან ურთიერთობას, თავს მოგაჭრიო და ასე შემდეგ. ამას ყვებიან ბავშვები გამოძიების ეტაპზე მიცემულ ჩვენებებში. მუქარა ბავშვმა აღიქვა რეალურად და დღემდე მას სჭირდება ფსიქოლოგის დახმარება,“ – ამბობს პროკურორი გიორგი რამიშვილი.

„არასრულწლოვანთა მართლმსაჯულების კოდექსიდან“ გამომდინარე, ბავშვები სპეციალიზებულმა სასამართლომ უნდა დაკითხოს ფსიქოლოგისა და ბავშვების კანონიერი წარმომადგენლის თანდასწრებით. პროკურორის თქმით, სხვა უშუალო მოწმე არ არსებობს, მაგრამ დაიკითხებიან სხვა პირებიც, რომლებიც დაადასტურებენ, როგორ განიცადა ბავშვმა მუქარა, რომ მას ეშინოდა გარეთ გასვლის, ჰქონდა ფსიქოლოგიური პრობლემები და ასე შემდეგ.

ბრალდებულის ადვოკატის, რამინ პაპიძის თქმით, ბავშვების გარდა, ერთადერთი მოწმე ამ საქმეში ქობულეთის პოლიციის ყოფილი თანამშრომელი კობა კილაძეა, რომლის ჩვენებაც სასამართლოსთვის დამაჯერებელი არ უნდა იყოს: „გააჩნია რამდენად თანმიმდევრული და დამაჯერებელი იქნება ასევე ბავშვების მიერ სასამართლოსთვის მიცემული ჩვენებები. ძალიან რთული იქნება მუქარის დადასტურება და შემოდავება, რომ თურმე ბრალდებული ემალებოდა პოლიციას. თავიდან, როცა მოსახლეობის ნაწილი საპროტესტო აქციებს მართავდა, თავად პოლიციამ ურჩია დიმიტრის გარიდებოდა სიტუაციას,“ – ამბობს ადვოკატი.

„ასეთი მოთხოვნა პოლიციას არ ჰქონია,“ – გვითხრა პროკურორმა გიორგი რამიშვილმა: „მასთან დაკავშირება შეუძლებელი აღმოჩნდა მითითებულ ტელეფონის ნომერზე, ასევე საცხოვრებლის მისამართზე, დაბარების მიუხედავად, ის არ გამოცხადდა საგამოძიებო ორგანოში. დიმიტრი გ.-ს დაკავება მოხერხდა ოპერატიულ-საგამოძიებო მოქმედებების შედეგად 27 ივნისს“.

ჯერ უცნობია, რომელი მოსამართლე განიხილავს არსებითად არასრულწლოვნის მუქარაში ბრალდებულის საქმეს. წინასასამართლო სხდომა ბათუმის საქალაქო სასამართლოს თავმჯდომარე დავით მამისეიშვილმა ჩაატარა და მან ბრალდებულს წინასწარი პატიმრობა 10 000-ლარიანი გირაოთი შეუცვალა.

პროკურორ გიორგი რამიშვილის ინფორმაციით, ბრალდებული დიმიტრი გ.-ს წარსულშიც ჰქონდა პრობლემები სამართალთან, თუმცა ამ დროისთვის მას ნასამართლეობა აღარ აქვს. დიმიტრი გ.-ს გაუპატიურებასა და ცეცხლსასროლი იარაღის უკანონო შენახვა-ტარებას ედავებოდნენ.

ბრალის დამტკიცების შემთხვევაში, დიმიტრი გ.-ს არასრულწლოვანზე მუქარისთვის დასჯიან ჯარიმით, საზოგადოებისთვის სასარგებლო შრომით ვადით – 120-დან 180 საათამდე, ან გამასწორებელი სამუშაოთი ვადით ერთ წლამდე, ან ერთ წლამდე თავისუფლების აღკვეთით. სწორედ ამ სანქციებს ითვალისწინებს სისხლის სამართლის კოდექსის 151-ე მუხლი, რომლის სრული სიმკაცრით გამოყენება უკვე მოითხოვა სასამართლოში პროკურატურამ. არასრულწლოვანთან გარყვნილი ქმედების დადასტურების შემთხვევაში [სსკ-ის 141-ე მუხლი] კი, იგი 5-დან 7 წლამდე თავისუფლების აღკვეთით დაისჯებოდა. ამ სასჯელს ითხოვდა დაზარალებულის დედა, რომელიც ირწმუნება, რომ ბრალდებულმა მისი შვილის გაუპატიურება სცადა.

ნეტგაზეთის მასალების სხვა გამოცემებში გადაბეჭდვის წესი
ავტორი