როგორც წინასწარ იყო ცნობილი, აჭარის მთავრობის თავმჯდომარემ უმაღლესი საარჩევნო კომისიის [უსკო] თავმჯდომარის პოსტზე დავით კვაჭაძე შეარჩია. კანდიდატურა მან აჭარის უმაღლეს საბჭოს დასამტკიცებლად უკვე წარუდგინა. დავით კვაჭაძეს სახელისუფლებო გუნდის კანდიდატად მოიხსენიებდნენ. ითქვა, რომ ის თვითმმართველობის არჩევნებზე “ქართული ოცნების” შტაბს ხელმძღვანელობდა.
დავით კვაჭაძე
ბოლო პერიოდში დავინტერესდი და შევისწავლე უსკოს საქმიანობა. მაქვს პროექტი, რომელიც ალბათ განსახილველი იქნება უსკოს სხვა წევრებთან ერთად. ვიმსჯელებთ და შევჯერდებით. მთავარია, რაც შეიძლება გამარტივდეს და გამჭვირვალე გახდეს უსკოს მუშაობა. ეს იქნება ჩემი მიზანი. როცა უმაღლესი საბჭო გადაწყვეტილებას მიიღებს, თუ მე მექნება უსკოს თავმჯდომარის უფლებამოსილება, ამის შემდეგ ვისაუბრებ ამ პროექტზე.
არჩევნები, რომლის ჩატარებაც უსკოს მთავარი მოვალეობაა, ოთხ წელიწადში ერთხელ იმართება. სხვა დროს უსკოს ან მის თავმჯდომარეს რა საქმე უნდა ჰქონდეს?
აუცილებლად უნდა ჰქონდეს საქმე, სხვადასხვა ქვეყნის ბევრი მაგალითი გვაქვს. ვფიქრობ, სხვა აქტივობებშიც უნდა ჩაერთონ უსკოს თანამშრომლები, რომ უფრო მეტი გამოცდილება მიიღონ.
იზრუნებთ თუ არა იმ პირების გადამზადებაზე, რომლებიც ხშირად მუშაობენ საუბნო თუ საოლქო საარჩევნო კომისიებში?
განვითარება და ახალი გამოცდილება ადამიანს ყოველთვის სჭირდება. მითუმეტეს, რომ კანონმდებლობაში შედის ცვლილებები და ამ ყველაფერს შესწავლა სჭირდება. იცვლება ასევე მიდგომები და სამუშაოს ტემპი. ადამიანი ყოველთვის უნდა სწავლობდეს, მითუმეტეს, თუ მას აქვს პასუხისმგებლობა.
იმ წევრებს შორის, რომლებსაც ოლქი არჩევს, უმეტესწილად ერთი და იგივე სახეებია, მათ შორის ბევრს არჩევნებზე დარღვევების გამო დისციპლინარული გადაცდომაც ჰქონდა. კითხვაზე, რატომ ხვდებიან ეს ადამიანები ისევ კომისიებში, გვპასუხობდნენ, რომ მცოდნე კადრების ნაკლებობაა. როგორ ფიქრობთ, ვინ უნდა იზრუნოს ამ მხვრივ კადრების მომზადებაზე?
თქვენ მგონი ჩემი პროექტი ან ჩემი გამოსვლა გაქვთ ნანახი. მე მომხრე ვარ, რაც შეიძლება მეტი ახალგაზრდა ჩაერთოს ამ საქმეში. მოვამზადოთ ისინი და გავზარდოთ პროფესიონალებად. ბევრს აქვს იურიდიული განათლება, მათი რესურსი უნდა გამოვიყენოთ. კადრი არ გვეყოლება, თუ არ მოვამზადეთ. მომავალზე ყველა სამსახურმა უნდა იფიქროს. ხშირად ვაწყდებით თემას, რომ მოჰყავთ ნათესავები და მერე ისინი ზიან წლობით. მე ამის წინააღმდეგი ვარ.
კომისიებში იმ ადამიანების დაბრუნებას რა ხერხით შეეწინააღმდეგებით, რომლებსაც გადაცდომების გამო დისციპლინარული სასჯელი ჰქონდათ დაკისრებული?
მე არასდროს არ გამიწევია იმ ადამიანისთვის რეკომენდაცია, რომელსაც გადაცდომები ჰქონია და არც მათ კომისიებში მოხვედრას დავუჭერ მხარს. თუ ადამიანს ორჯერ და სამჯერ შეეშალა, ამ ადამიანმა სხვა საქმე უნდა მოძებნოს.
მაინტერესებს თქვენი მოსაზრება მაჟორიტარული სისტემის გაუქმებაზე, ემხრობით თუ არა?
ვემხრობი ან არ ვემხრობი ასეც არ არის, ამას დადებითი მხარეც აქვს და უარყოფითიც. როდესაც მივიღებ უსკოს თავმჯდომარის უფლებამოსილებას, ამ საკითხზე ჩემს მოსაზრებას შემდეგ დავაფიქსირებ.
თქვენ სახელისუფლებო გუნდის “ქართული ოცნების” კანდიდატად მოგიხსენიებენ. ითქვა, რომ იყავით “ქართული ოცნების” ერთ-ერთი შტაბის წევრი და ასევე შეხვედრებზეც ჩნდებოდით “ქართული ოცნების” სახელით…
“ქართულ ოცნებასთან” კავშირი მქონია ისეთივე, როგორიც მაქვს სხვა პოლიტიკურ პარტიებთან, ბევრი ნაცნობი მყავს როგორც პარტიებში, ასევე პოლიტიკოსებში და ბევრს ვუწევდი კონსულტაციას. “ქართული ოცნების” სახელით შეხვედრაზე არასდროს ვყოფილვარ.
ფიქრობთ, რომ უმაღლესი საბჭო დაგიჭერთ მხარს? ხომ არ გეგმავთ შეხვდეთ მათ კენჭისყრამდე?
თუ სურვილი ექნებათ, შევხვდები. ერთი ქალბატონი გამოვიდა ტელევიზიით, უმაღლესი საბჭოს წევრი და თქვა, რომ სასურველი კანდიდატი არ ვიქნები, რადგან `ქართული ოცნების~ კანიდიდატი ვარ. გული დამწყდა. არ უნდა თქვან ის, რაც არ იციან.
P.s. დავით კვაჭაძის კონკურენტები უსკოს თავმჯდომარის პოზიციაზე იყვნენ აჭარის მთავრობის ერთ-ერთი დეპარტამენტის თავმჯდომარე პარმენ ჯალაღონია და ბათუმის მერიის ზედამხედველობის სამსახურის უფროსის მოადგილე დავით ქარცივაძე. უსკოს თავმჯდომარე ირჩევა 5 წლის ვადით. უსკოს თავმჯდომარის ხელფასი 2390 ლარია.
