Batumelebi | ღარიბაშვილი ინვესტორებს: ”თქვენს მიერ განხორციელებული ინვესტიციის თითოეული ცენტი იქნება დაცული” ღარიბაშვილი ინვესტორებს: ”თქვენს მიერ განხორციელებული ინვესტიციის თითოეული ცენტი იქნება დაცული” – Batumelebi
RU | GE  

ღარიბაშვილი ინვესტორებს: ”თქვენს მიერ განხორციელებული ინვესტიციის თითოეული ცენტი იქნება დაცული”

 

 

საქართველო-თურქეთი-აზერბაიჯანის ბიზნეს ფორუმი, საქართველოს პრემიერ მინისტრმა, ირაკლი ღარიბაშვილმა მისასალმებელი სიტყვით გახსნა. 

“საქართველოსთვის აზერბაიჯანი და თურქეთი ნამდვილი მეგობარი სახელმწიფოები და ჩვენი მთავარი სავაჭრო პარტნიორები არიან. ჩვენ ყოველთვის ვაფიქსირებთ მზაობას, კიდევ უფრო გავამყაროთ ჩვენი სავაჭრო-ეკონომიკური ურთიერთობები. იმედი მაქვს, რომ ჩვენი შეხვედრა იქნება ნაყოფიერი და ბევრ ახალ ინიციატივას ჩაეყრება საფუძველი. ჩვენთვის ძალიან საამაყოა ასეთი ძლიერი პარტნიორები რეგიონში, რომლებიც მსოფლიოში, სხვადასხვა ბიზნეს სექტორში არიან მოწინავე პოზიციებზე”- განაცხადა ირაკლი ღარიბაშვილმა.

პრემიერის თქმით, ბოლო წლების განმავლობაში, საქართველო-თურქეთისა და საქართველო-აზერბაიჯანის ეკონომიკურ ურთიერთობებში ყველაზე ნაყოფიერი პერიოდია. მან იმედი გამოთქვა, რომ მომავალში ასეთი ურთიერთობის ტენდენცია შენარჩუნდება და ამ თანამშრომლობის შედეგად ბევრი წარმატებული პროექტიც განხორციელდება.

ირაკლი ღარიბაშილმა სიტყვით გამოსვლისას, უცხოელ სტუმრებს მიმართა:

“ჩვენი მთავრობა მაქსიმალურად ცდილობს, ჩვენი ქვეყნის ეკონომიკისა და ბიზნესის განვითარების ხელშეწყობით კიდევ უფრო მიმზიდველი გარემო შექმნას და კიდევ უფრო ხელი შეუწყოს ინვესტიციების შემოტანას საქართველოში. დარწმუნებული ვარ, ჩვენ ქვეყნებს – საქართველოს, აზერბაიჯანსა და თურქეთს, ძალიან დიდი პოტენციალი გვაქვს და ყველას ერთად შეგვწევს ძალა მთლიანად ჩვენი რეგიონი ვაქციოთ მნიშვნელოვან კავშირად, აღმოსავლეთსა და დასავლეთს შორის, ეკონომიკურ ურთიერთობებში. ჩვენი ქვეყნის კარი, თქვენთვის ყოველთვის ღიაა. საქართველოში ნამდვილად არის სამართლიანი და უსაფრთხო საინვესტიციო გარემო და თქვენს მიერ განხორციელებულ ინვესტიციის თითოეული ცენტი იქნება მაქსიმალურად დაცული”- განაცხადა პრემიერმ-მინისტრმა.

ნეტგაზეთის მასალების სხვა გამოცემებში გადაბეჭდვის წესი
''ბათუმელები''