Batumelebi | „ჟილინის არხის“ ერთ-ერთი ინვესტორი დააკავეს „ჟილინის არხის“ ერთ-ერთი ინვესტორი დააკავეს – Batumelebi
RU | GE  

„ჟილინის არხის“ ერთ-ერთი ინვესტორი დააკავეს

 

ფინანსთა სამინისტროს საგამოძიებო სამსახურმა დღეს გაავრცელა განცხადება, რომლის მიხედვითაც ბათუმში მშენებარე „ჟილინის არხის“ ერთ-ერთი კომპანიის დირექტორი დააკავეს.

 

ფინანსთა სამინისტრომ ჩატარებულ ოპერაციასთან დაკავშირებით განცხადება გაავრცელა, რომელსაც უცვლელად გთავაზობთ:

 

ჟილინის არხი
ჟილინის არხი

„გატარებული საგამოძიებო მოქმედებების შედეგად, სახელმწიფო ბიუჯეტის კუთვნილი 1 181 001.31 ლარის მითვისების ფაქტზე შპს ,,ტონი და კომპანიას“ დირექტორი, დიმიტრი ფერაძე დააკავა.

გამოძიებამ დაადგინა, რომ 2013 წლის 22 მარტს ქ.ბათუმის მერიასა და შპს „ტონი და კომპანიას“ შორის გაფორმდა ხელშეკრულება “ჟილინის არხის” სარეკონსტრუქციო სამუშაოების შესახებ და ავანსის სახით კომპანიას ჩაერიცხა 1 289 972 ლარი. ბრალდებულმა, ნაცვლად იმისა, რომ განეხორციელებინა ხელშეკრულებით ნაკისრი ვალდებულებები, მართლსაწინააღმდეგოდ მიითვისა და არამიზნობრივად გაფლანგა 1 181 000 ლარი, რითაც დიდი ოდენობით ფინანსური ზიანი მიაყენა ქ.ბათუმის მერიასა და სადაზღვევო კომპანია „უნისონს“. 

გამოძიება გრძელდება საქართველოს სისხლის სამართლის კოდექსის 182-ე მუხლით, რაც სასჯელის სახით ითვალისწინებს 7-დან 11 წლამდე პატიმრობას“.

 

გასულ კვირას ბათუმელებისთვის ცნობილი გახდა, რომ „ჟილინის არხის“ მშენებელ კიდევ ერთ კომპანიასთან შეწყვიტა მერიამ ურთიერთობა. კომპანიაში ამბობენ, რომ ბათუმის მერიას ხელშეკრულების შეწყვეტის გამო სასამართლოში უჩივლებენ. ბათუმის მერია ამ არხის აშენებას უკვე 3 წელია ცდილობს, მაგრამ დღემდე ვერ მოახერხა.

ნეტგაზეთის მასალების სხვა გამოცემებში გადაბეჭდვის წესი
ბათუმელები