ქობულეთის გამგებლის სულხან ევგენიძის ინფორმაციით, ქობულეთში მდინარე აჭყვის კალაპოტიდან გადმოსვლის საშიშროება არსებობს. გამგებლის თქმით, საფრთხე ექმნება გელაურის, ლესელიძის და გურამიშვილის დასახლებას.
ქობულეთის საკრებულოს წევრი ენმ-დან, ბონდო თედორაძე კი „ბათუმელებთან“ საუბარში ამბობს, რომ მდინარე აჭყვა უკვე გადმოსულია კალაპოტიდან და გზის მონაკვეთია დატბორილი.
„მდინარე უკვე გადმოსულია და დატბორილია ე.წ. ვილარის დასახლება. არის საფრთხე მიმდებარე ტერიტორიების დატბორვის, ამიტომ ვაფრთხილებთ მოსახლეობას, განსაკუთრებით მათ ვინც პირველ სართულებზე ცხოვრობს, რომ მიიღონ შესაბამისი ზომები ზარალის თავიდან ასაცილებლად“- ამბობს ბონდო თედორაძე.
მისი თქმით, ძლიერი წვიმების დროს მდინარე აჭყვა ხშირად გადმოდის კალაპოტიდან, რადგან ის ხუთი წელია არ გაწმენდილა. „გაწმენდის შემდეგ მინიმუმ ორი წლის განმავლობაში მდინარე არ გადმოდის, მაგრამ ხელისუფლებას უკვე მეხუთე წელია კალაპოტი არ გაუწმენდია“ – გვეუბნება ის.
ქობულეთის გამგებელი კი ამბობს, რომ ის დატბორილ უბნებს მოინახულებს და შესაბამის ზომებს მიიღებენ. ძლიერი წვიმების შედეგად დღეს ქობულეთში, სოფელ ალამბარში მეწყერი ჩამოწვა და მოსახლეობასთან მისასვლელი გზა ჩახერგა.
