აჭარის სოფლის მეურნეობის სამინისტრო „მემცენარეობის დარგის განვითარების ხელშეწყობის“ პროგრამის ფარგლებში მიმდინარე წელს 197 ათასამდე ლარის კაკლის, თხილისა და მოცვის ნერგებს შეისყიდის. შესაბამისი ტენდერები სამინისტრომ უკვე გამოაცხადა.
დაგეგმილია 10 100 ცალი ნამყენი კაკლის [ჯიში ჩანდლერი, სავარაუდო თანხა 101 ათასი ლარი], 32 ათასი ცალი თხილის [ჯიში – ბერძნულა, 22 400 ლარი] და 10 500 ცალი ამერიკული ლურჯი მოცვის [73 500 ლარი] ნერგის შეძენა.
ტენდერში გამარჯვებულმა ნერგები სამინისტროს მიმდინარე წლის მარტ-აპრილის თვეში [შემსყიდველისაგან მიღებული შეტყობინებიდან არაუგვიანეს ათი სამუშაო დღის ვადაში უნდა მიაწოდოს. გამარჯვებულებს კი 9 თებერვალს გამოავლენენ.
სამინისტროს მიზანი ნერგებით ფერმერთა და აგრომეწარმეთა უზრუნველყოფის ხელშეწყობაა და ანალოგიური პროგრამა წინა წლებშიც ხორციელდებოდა. ბენეფიციარებს სამინისტრო შეარჩევს.
პრეტენდენტი ვალდებულია შერჩევა/შეფასების ეტაპზე, სატენდერო კომისიის მოთხოვნის შესაბამისად, უზრუნველყოს სპეციალისტების მიერ იმ სანერგე მეურნეობის დათვალიერება, სადაც წარმოებული ნერგის მოწოდება მოხდება გამარჯვებულის მიერ.
ნერგების მიწოდება ფერმერებსა და აგრომეწარმეებზე უნდა განხორციელდეს აჭარის ავტონომიური რესპუბლიკის ტერიტორიაზე სამინისტროს მიერ მითითებულ მისამართზე.
