შცეიცარიის განვითარების სააგენტოს და აჭარის მთავრობის დაფინანსებით, „სოციალური კვლევებისა და ანალიზის ინსტიტუტმა“ სხვადასხვა სამიზნე ჯგუფის საცხოვრებლით უზრუნველყოფის საჭიროების კვლება ჩაატარა. კვლევა მხოლოდ აჭარის რეგიონს მოიცავს. კვლევის სამიზნე ჯგუფს სტიქიის შედეგად დაზარალებული, უსახლკაროები და სოციალურად დაუცველი ოჯახები წარმოადგენდნენ. კვლევის შედეგების პრეზენტაცია ბათუმის საკრებულოში სოციოლოგმა იაგო კაჭკაჭიშვილმა წარმოადგინა.
კვლევის დროს შესწავლილი იყო ზემოთ დასახელებული სამივე კატეგორიაში მყოფი ოჯახების სოციალური მდგომარეობა და შესაძლებლობები, თუ რამდენი ლარის გადახდას შეძლებენ ეს ოჯახები თვეში, ერთ კვადრატულ მეტრში, იმისათვის რომ იაფი სახლის ფარგლებში, საკუთარი საცხოვრებლის გამოსყიდვა შეძლონ.
კვლევების მიხედვით, საბაზრო ფასთან მიახლოებული თანხა, – 2,78 ლარი უსახლკაროებისთვის მისაღები თანხაა, სტიქის შედეგად დაზარალებული და სოციალიურად დაუცველ პირებს კი ორ ლარზე ნაკლების გადახდა შეუძლიათ.
ბათუმის საკრებულოს თავმჯდომარის მოადგილის, ირაკლი ჩავლეიშვილის განცხადებით, აღნიშნული კვლევა სრულყოფილია და „იაფი სახლის“ ბენეფიციართა კატეგორიების განსაზღვრისთვის აჭარის მთავრობა აუცილებლად გამოიყენებს:
„იმისათვის, რომ კარგად ყოფილიყო გაწერილი იაფი სახლის ბენეფიციართა კატეგორიები, დაველოდეთ კვლევას, რომელიც ვფიქრობ, რომ სრულყოფილია და გათვლილია იმ სოციალურ ჯგუფებზე, რომელთაც საცხოვრებელი სახლი ესაჭიროებათ.
კვლევა გვაჩვენებს, რამდენად მზად არიან ეს მიზნობრივი ჯგუფები, იმისათვის რომ გრძელვადიან პერსპექტივაში შეძლონ საკუთარი საცხოვრებლის გამოსყიდვა. ჩემთვის მოულოდნელი იყო კვლევის შედეგი, რადგან ყველაზე მეტი მზაობა სწორედ უსახლკაროებმა გამოხატეს“ – აცხადებს ირაკლი ჩავლეიშვილი. უსახლკაროებში შედის მოსახლეობის ის კატეგორია, რომელსაც საცხოვრებელი ფართი არ გააჩნია.
„სოციალური კვლევებისა და ანალიზის ინსტიტუტის“ მიერ ჩატარებულ კვლევებზე დაყრდნობით, როგორც ირაკლი ჩავლეიშვილი ამბობს, აჭარის მთავრობა და საკრებულო „იაფი სახლის“ მოსარგებლეთა კატეგორიების ჩამოყალიბებას უახლოეს მომავალში დაიწყებს.
