ქედის მუნიციპალიტეტის გამგეობა სოფლებში ინფრასტრუქტურის კეთილმოწყობაზე წელს 420 000 ლარს დახარჯავს.
გამგეობის ინფრასტრუქტურის სამსახურის უფროსის, სულიკო ბოლქვაძის ინფორმაციით, თანხის დიდი ნაწილი სოფლებში გარეგანათების, საცალფეცხო ბილიკების, სანიაღვრე არხებისა და საპირფარეშოების მოწყობას მოხმარდება.
„რადგანაც ცენტრალური ბიუჯეტიდან „სოფლის მხარდაჭერის პროგრამა“ წელს არ დაფინანსდა, გადავწყვიტეთ კეთილმოწყობითი სამუშაოები სოფლებში ადგილობრივი ბიუჯეტიდან დაგვეფინანსებინა და ამისთვის 420 000 ლარი გამოვყავით, კრებები ჩავატარეთ, მოსახლეობამ პრიორიტეტად 300 – მდე წინადადება დააყენა, საიდანაც ასზე მეტი სოფლებში კეთილმოწყობითი სამუშაოების განხორციელებას ითვალისწინებდა, რაზეც შესაბამისი პროექტები მოვამზადეთ. აღმოჩნდა, რომ ასივე პროექტის განხორციელებას გაცილებით მეტი თანხა სჭირდებოდა, ვიდრე გაგვაჩნდა. არსებული თანხა თემების მიხედვით მოსახლეობის რაოდენობის შესაბამისად გადავანაწილეთ, როგორც სოფლის მხარდაჭერის პროგრამა ითვალისწინებდა, მაგალითად, მახუნცეთის თემს 78 000 ლარი ერგო,“ – ამბობს სულიკო ბოლქვაძე.
სულიკო ბოლქვაძის თქმით, მოსახლეობის მიერ პრიორიტეტად დასახელებული ის ინფრასტრუქტურული პროექტები, რაც არასაკმარისი თანხის გამო წელს ვერ მოეწყობა, გამგეობა 2018 წლის ბიუჯეტით განახორციელებს.
„მოსახლეობის მოთხოვნა სრულად რომ შესრულებულიყო, დამატებით 300 000 ლარი იყო საჭირო, რადგანაც პროექტები უკვე არსებობს, 2018 წელს განვახორციელებთ.“
კეთილმოწყობითი სამუშაოები ქედის სოფლებში წლის ბოლომდე უნდა დასრულდეს.
