როგორ მოჰყავთ თამბაქო კოკოტაურში [ფოტო, ვიდეო]

თამბაქო ქედის მუნიციპალიტეტის სოფელ კოკოტაურში მცხოვრებ მოსახლეობის უმრავლესობას მოჰყავს. საკუთარ მეურნეობაში დაკრეფილ თამბაქოს ფოთლებს კოკოტაურელები ძაფსა თუ სპეციალურ მავთულზე ასხამენ და ეზოებსა თუ ბაღჩებში, პოლიეთილენის პარკით გადახურულ ტერიტორიაზე ახმობენ. გადარჩეული, გამომშრალი თამბაქო გასაყიდად ადგილობრივებს ბათუმში ჩააქვთ გასაყიდად და გადამყიდველებს აბარებენ.

გამხმარი თამბაქო მშრალ გარემოში წლების განმავლობაში ინახება, მოსახლეობა მას ძირითადად მაშინ ჰყიდის, როცა ფასი ხელსაყრელია.

თამბაქოზე ფასის მატებასთან ერთად მოსახლეობამ ეს კულტურა ქედაში იმ სოფლებშიც გააშენა, სადაც წინა წლებში კიტრი და პომიდორი მოჰყავდათ. ქედელი გლეხების თქმით, თამბაქო შრომატევადი, თუმცა საკმაოდ კარგად ანაზღაურებადი კულტურაა. 1 კილოგრამი თამბაქოს ჩაბარების ფასი 30-დან 70 ლარია, ხარისხის გათვალისწინებით.

მეზობლებისგან განსხვავებით აბაშიძეების ოჯახმა თამბაქო ბოლო შვიდი წლის განმავლობაში წელს პირველად დარგო. ნინო ქმართან და შვილებთან ერთად ბათუმში ცხოვრობს, დედამთილი და მამამთილი კი – კოკოტაურში. ნინო ამბობს, რომ კვირაში ერთხელ ამოდის სოფელში და დედამთილს თამბაქოს გამოყვანაში ეხმარება.

„თამბაქოს გამოყვანას ბევრი შრომა სჭირდება, წელს შვილიშვილი აბიტურიენტია, სწავლის გაგრძელებას აპირებს უმაღლესში, სწავლას დიდი თანხა სჭირდება, თამბაქო ამისთვის დავრგეთ, ამოდიან ქალაქიდან და ერთად ვამუშავებთ,“ – ამბობს ლამარა აბაშიძე.