ბათუმში „სთრით არტ“ ფესტივალის ჩასატარებლად აჭარის განათლების, კულტურისა და სპორტის სამინისტრომ 30 მაისს ტენდერი გამოაცხადა. ამ ეტაპზე წინადადებების მიღება დასრულებულია და მათი განხილვა მიმდინარეობს.
ტენდერში მხოლოდ ერთი კომპანია შპს „არტ სტუდია“ “Dotcomma“ მონაწილეობს, რომელმაც სამინისტროს ფესტივალის ჩატარება 34 300 ლარად შესთავაზა.
„სთრით არტ“ ფესტივალი აჭარის განათლების, კულტურისა და სპორტის პროექტის „ქუჩის ხელოვნების ფესტივალის ორგანიზება აჭარაში“ ქვეპროგრამის – „კულტურის თანამედროვე მიმართულების განვითარების ხელშეწყობის“ ფარგლებში ხორციელდება.
ფესტივალის ფარგლებში, 500 მ2 ფართობზე შენობა-ნაგებობების კედლებზე ხელოვნების ნამუშევრებს 12 ხელოვანი შექმნის, მათ შორის – უცხოელი ხელოვანი. ნამუშევართა თემატიკა თანამედროვე ტენდეციების გათვალისწინებითა და გარემოს ლანდშაფტზე მორგებულობით შეირჩევა.
„სთრით არტ“ ფესტივალის ჩატარების ზუსტი თარიღი ჯერ უცნობია, თუმცა სატენდერო დოკუმენტაციაში აღნიშნულია, რომ ფესტივალი 2017 წლის 30 ივლისამდე უნდა გაგრძელდეს.
„სთრით არტ“ ფესტივალი ბათუმში პირველად 2013 წელს ჩატარდა და მას შემდეგ ყოველწლიურად ტარდება. ფესტივალში მონაწილეობას ქართველ ხელოვანებთან ერთად უცხოელი ხელოვანებიც იღებენ. გასულ წელს ფესტივალის ფარგლებში მხატვრებმა ბათუმის გარდა აჭარის სხვა მუნიციპალიტეტების კედლებიც მოხატეს.
“Dotcomma” იყო ფესტივალის ორგანიზატორი გასულ წლებშიც.
მთავარ ფოტოზე: სთრით არტ ფესტივალი 2016. ფოტო „ბათუმელების“ არქივიდან
ამავე თემაზე:
