Batumelebi | რა გახდა ახალშობილი ტყუპების გარდაცვალების მიზეზი რა გახდა ახალშობილი ტყუპების გარდაცვალების მიზეზი – Batumelebi
RU | GE  

რა გახდა ახალშობილი ტყუპების გარდაცვალების მიზეზი

 

შუახევის მუნიციპალტეტის სოფელ დღვანში 11 ივნისს ორი ახალშობილი გარდაიცვალა.  ტყუპები სახლში გაჩნდნენ, მას შემდეგ, რაც ექვსი თვის ფეხმძიმე ქალი საავადმყოფოდან ოჯახში დაბრუნდა და ნაადრევი მშობიარობა დაეწყო.  

 

რა გახდა ტყუპების გარდაცვალების მიზეზი და რატომ გამოუშვეს ტკივილების ჩივილით მისული ფეხმძიმე ქალი საავადმყოფოდან? აჭარის ჯანდაცვის მინისტროს მოადგილე, ლევან გორგილაძე ამბობს, რომ სამინისტრო საქმის კურსშია და ამ დროისათვის მათ ხელთ არსებული დოკუმენტაციის თანახმად, ექიმის დანაშაული არ იკვეთება.

 

„ფიზიოლოგიურად მიმდინარეობდა ორსულობა, აღრიცხვაზე დროულად იყო აყვანილი  და ყველა გამოკვლევა ჩატარებული აქვს, გეგმიური კონსულტაციებიც. როგორც ირკვევა, ოჯახში, წინა დღეებში გარკვეული სიტუაცია იყო, რამაც გამოიწვია ორსული ქალბატონის ფიზიკური გადაღლა და ჰქონდა ტკივლები.  მას  სატელეფონო საუბარი  ჰქონდა მის ექიმთან, რომელმაც ურჩია მიემართა სტაციონარისთვის.  

 

სტაციონარში მორიგეობდა სხვა გინეკოლოგი, რომელმაც გააკეთა ექოსკოპია, მე პირადად ვნახე ექოსკოპიის მონაცემები, იქ არ იკვეთება განსაკუთრებული პათოლოგია, რომელიც მოითხოვდა სტაციონარში მოთავსების აუცილებლობას. პაციენტიც არ გრძნობდა თავს ცუდად და მან გადაწყვიტა სახლში წასულიყო. ნაადრევი მშობიარობა შეძლება გამოიწვია მისმა გადაადგილებამ.“  – ამბობს ლევან გორგილაძე.  

 

მისი თქმით,  იმ შემთხვევაში, თუ პაციენტი გადაწყვეტდა სტაციონარში დაწოლას, მას თავად უნდა აენაზღაურებინა ხარჯები ან ეს თანხა უნდა ანაზღაურებულიყო აჭარის ჯანდაცვის სამინისტროს სხვა პროგრამის ფარგლებში, რადგან სახელწიფო პროგრამაში ეს ხარჯები არ შედიოდა.

 

ლევან გორგილაძის თქმით, საკითხს აჭარის ჯანდაცვის სამინისტრო შეისწავლის, თუმცა ექიმის პასუხისგმებლობის საკითხის დაყენების უფლება მხოლოდ საქართველოს ჯანდაცვის სამინისტროსთან არსებულ სამედიცინო რეგულირების საააგენტოს აქვს.

 

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"