შუახევში, პედაგოგებთან შეხვედრაზე, საქართველოს განათლების მინისტრმა ალექსანდრე ჯეჯელავამ საპენსიო ასაკის პედაგოგებზეც ისაუბრა და აღნიშნა, რომ სკოლიდან პედაგოგის წასვლის საკითხი მხოლოდ მაშინ დადგება, თუ პედაგოგს გაკვეთილის ჩატარება და მოსწავლეებთან ურთიერთობა არ შეეძლება.
„როცა შეფასების სქემიდან ამოვიღეთ – „თუ არა და სახლში წადი“, წამოვიდა კრიტიკა, რომ არასდროს არავინ წავა სახლში და იყო კითხვები, თუ არ დაიხოცებიან დაფებთან, მანამდე სკოლებში დარჩებიანო? ვადასტურებ, რომ კარგი მასწავლებელი მანამდე დარჩება სკოლაში, სანამ შეეძლება კარგი გაკვეთილის ჩატარება, მოსწავლეებთან ურთიერთობა. თუ არ ესმის და ვერ ხედავს, ეს სხვა საკითხია, მე 25 წლის „მკვდარიც“ მინახავს. სკოლიდან მხოლოდ ის წავა, ვინც წასასვლელია, იქნება 25, 45 თუ 65 წლის. და, ზოგადად, პედაგოგების ასაკთან დაკავშირებული საკითხი საერთოდ არ განიხილება.
ჩემი ნება რომ იყოს, სკოლიდან პირველი იმას გავუშვებდი, უფროსი მასწავლებელი რომ გახდა, კუდი რომ გადო ყავარზე და თავის კოლეგებს ზემოდან რომ უყურებს. სკოლა არ არის სირბილის ჩემპიონატი, კვალიფიკაცია მნიშვნელოვანი კრიტერიუმია, თუმცა არა პირველი და ერთადერთი,“ – განაცხადა ჯეჯელავამ.
