მოსამართლე ირაკლი შავაძემ ასიმ ე. გაამართლა. მას განსაკუთრებით დიდი ოდენობით ნარკოტიკული საშუალების შეძენა-შენახვა ედებოდა ბრალად.
მოსამართლის დასაბუთება ჯერ უცნობია, თუმცა ბრალდებულის ადვოკატი, ჯემალ კიკნაძე მიიჩნევს, რომ გამოძიებამ ფუნდამენტური ღირებულება დაარღვია საქმის წარმოების დროს, რაც გამამართლებელი განაჩენის საფუძველი გახდა.
ასიმ ე. თურქეთის მოქალაქეა. ის პოლიციელებმა ბათუმში, ნინოშვილის ქუჩაზე დააკავეს. გამოძიების მასალების მიხედვით, ასიმ ე.-ს ჩხრეკის დროს 60 აბი სუბოტექსი აღმოაჩნდა, ხოლო ნაქირავებ ბინაში – 46 აბი.
მიუხედავად იმისა, რომ ასიმი ქართულ ენას არ ფლობს, მისი ჩხრეკის, ასევე დაკავების დროს თარჯიმანი ჩართული არ ყოფილა.
ბრალის დადასტურების შემთხვევაში, ასიმ ე.-ს 20 წლამდე, ან უვადოდ თავისუფლების აღკვეთა ელოდა.
