ისინი 20 ათას მოქალაქეს დაურიგებენ სპეციალურ გამოცემას, რომელშიც კამპანიის მიზნებსა და იმ საფრთხეებზეა საუბარი, რის წინაშეც შეიძლება აღმოჩნდეს ნებისმიერი ადამიანი უკანონო თვალთვალის შედეგად.
„ეს შენ გეხება-ისევ გვისმენენ“ კამპანიის ფარგლებში დაბეჭდილი სპეციალური გამოცემის ტირაჟი 20 ათასია. გამოცემა შეიცავს ინფორმაციას იმის შესახებ თუ რატომ არის მნიშვნელოვანი იმ კანონის მიღება, რომელიც ნებისმიერ ჩვენთაგანს დაიცავს უკანონო მოსმენებისგან. გამოცემა უფასოდ ურიგდებათ მოქალაქეებს ბათუმში. აქციის მონაწილეების ცნობა ადვილია, მათ აცვიათ სპეციალური მაისურები წარწერით „ეს შენ გეხება“.
ერთ-ერთი არასრულწლოვანი მოხალისე ამბობს, თუ რატომ გადაწყვიტა აქციაში ჩართვა: „ვფიქრობ, „ეს შენ გეხება-ისევ გვისმენენ“ მეც მეხება, რადგან 1 წლის განმავლობაში მეც ვიყავი ასე ვთქვათ „მსხვერპლი“ სატელეფონო მოსმენებისა, რადგან ჩემი და ჩემი ოჯახის წევრების ტელეფონის ნომერი იყო მითითებული ისეთი ადამიანის ტელეფონში, რომლისაც რაღაც გამოძიების გამო ისმენდნენ, მე ინფორმირებული ვიყავი, რომ ჩემი ტელეფონი ისმინებოდა, მაგრამ არ მიმიცია თანხმობა ამის შესახებ. თან არასრულწლოვანი ვარ და არ მსიამოვნებდა… რამდენიმე ხნის შემდეგ მშობლებმა გამომიცვალეს ნომერი, რადგან, მე ბავშვს არ მეგრძნო თავი შეშინებულად, ან რატომ უნდა ისმინებოდეს ჩემი ან ჩემი ოჯახის ტელეფონის, სახლის ნომერი, თუ მე არაფერში არ ვარ დამნაშავე და საერთოდ არ მეხება ეს საკითხი“.
