Batumelebi | სამხედრო გემი ბათუმის პორტს დღეს საღამოს დატოვებს სამხედრო გემი ბათუმის პორტს დღეს საღამოს დატოვებს – Batumelebi
RU | GE  

სამხედრო გემი ბათუმის პორტს დღეს საღამოს დატოვებს

 

ბათუმის პორტში ამერიკის შეერთებული შტატების სამხედრო საზღვაო ფლოტის დეპარტამენტის სამხედრო გემი „Taylor FFG-50“ იმყოფება. გემი ბათუმის პორტში დილის 7 საათზე შემოვიდა.

 

გემს ცერემონიით დახვდა ქალაქისა და აჭარის მმართველობა. 

 

ამერიკის სამხედრო ხომალდი Taylor FFG-50

 

„Taylor FFG-50“-ის კაპიტანის თქმით მათი ბათუმში ვიზიტი უკავშირდება მოკავშირე ქვეყნებს შორის უსაფრთხოებასა და ქვეყნებს შორის ურთიერთობაში მეზღვაურების ჩართულობას.

 

„Taylor FFG-50“ -ის ვიზიტი ბათუმში ერთი თვის წინ დაიგეგმა. გადავწყვიტეთ გვესარგებლა ამ შემთხვევით, რადგან ბევრი ჩვენი ხომალდის მეზღვაური არ იყო ნამყოფი საქართველოში. ჩვენი მისია უკავშირდება არა მარტო უსაფრთხოებას, არამედ მოკავშირე ქვეყნების მეზღვაურების ჩართულობას. ჩვენი ნიშანია 50. ხომალდს ხუთ მაისს შეუსრულდა 34 წელი. მას სხვადასხვა ამოცანის შესრულება შეუძლია, მათ შორის საჰაერო დაკვირვება, წყალქვეშა ნავების განადგურება, ზღვაზე ოპერაციების წარმოება, აბორდაჟული ოპერაციების განხორციელება, ასევე ამ გემით შესაძლებელია სხვა სახის საჯარისო ნაწილების მხარდაჭერა“ – განაცხადა გემის კაპიტანმა მერს მორისმა.

 

 

ამერიკის სამხედრო გემის დახვედრის ცერემონიაზე ამერიკის ელჩი საქართველოში რიჩარდ ნორლანდიც იმყოფებოდა.

 

 

რიჩარდ ნორლანდი: „ბათუმს კარგი ტრადიცია ჩამოუყალიბდა ამერიკული საზღვაო ძალების ხომალდების მასპინძლობისა. ვიზიტის მიზანია უსაფრთხოების სფეროში თანამშრომლობა და შავი ზღვის რეგიონში უსაფრთხოების უზრუნველყოფა, გამტკიცება პარტნიორობისა ჩვენ მოკავშირეეთან და პარტნიორებთან. საქართველოსთან კი ჩვენ ნამდვილად კარგი თანამშრომლობა გვაქვს ჩამოყალიბებული“.

 

„Taylor FFG-50“, დღეს 21 საათზე დატოვებს ბათუმს.

ნეტგაზეთის მასალების სხვა გამოცემებში გადაბეჭდვის წესი
ნინო ხიმშიაშვილი