ირაკლი ჟვანია: თუკი ვერ ვაშენებთ ისეთ შენობებს, რომლებიც ძეგლის სტატუსს დაიმსახურებენ, ესე იგი, ვერაფერს ვქმნით


დღეს, 24 აპრილს, ბათუმის ამერიკულ კუთხეში დოკუმენტური ფილმის – „არქიტექტურით მონათხრობი ამბავის“ ჩვენება და დისკუსია გაიმართა. დისკუსია  საზოგადოება „ბათომის“ თავმჯდომარემ, ნინო ინაიშვილმა გახსნა.

ფილმი ასახულია საქართველოს დედაქალაქში, თბილისში არსებული ურბანული დაგეგმარების პრობლემები. ფილმის მეორე ნაწილში – „ქალაქის ხმა“ საუბარია ნიუ-იორკის კულტურული მემკვიდრეობის შესახებ, იმაზე თუ ქალაქის ისტორიული შენობებისა და უბნების შენარჩუნების მიზნით, რა ძალისხმევა გასწია საზოგადოებამ.

ფილმის ჩვენება დისკუსია, კულტურულ მემკვიდრეობის შენარჩუნებაზე

ფილმის ჩვენება, დისკუსია კულტურული მემკვიდრეობის შენარჩუნებაზე

„მშვიდობის კორპუსის“ მონაწილე მერი ჩენდლერმა წარმოადგინა ქართული და ამერიკული კულტურული მემკვიდრეობის ნიმუშების შედარებითი ანალიზი. დისკუსიაზე მოწვეული იყო ჰუბერტ ჰამფრის სახელობის სტიპენდიანტი,  არქიტექტორი ირაკლი ჟვანია და არქიტექტორი გია რამიშვილი.

ირაკლი ჟვანიამ, ძირითადად, აშშ-ის საკანონმდებლო ნორმებზე ისაუბრა, რომელიც გაცილებით დახვეწილია, ვიდრე ქართული კანონმდებლობა.

მისი თქმით, კულტურული მემკვიდრეობის დაცვის საბჭოს რეკომენდაციები დეტალურია და ხშირად ისეთი ნიუანსებიც კი არის გათვალისწინებული, როგორიცაა, მაგალითად, წარწერები ამა  თუ იმ შენობაზე.

„ინვესტორი კი ვალდებულია გაითვალისწინოს ყველა რეკომენდაცია და ასახოს პროექტში. წინააღმდეგ შემთხვევაში, პროექტს მსვლელობა არ მიეცემა. გაწერილია ქუჩები და უბნები, თუ სად, მშენებლობის რა რეგულაცია მოქმედებს.

ერთი პროექტის განხილვა შესაძლებელია 2-3 წელიც კი მიმდინარეობდეს.  კულტურული მემკვიდრეობის ზონებში ეს პროცედურები კიდევ უფრო მეტად  დაცულია. თბილისის მერი კი ცოტა ხნის წინ თავს იწონებდა იმით, რომ გაამარტივებდა სამშენებლო ნებართვების გაცემას, რაც დაუშვებელია“.

ირაკლი ჟვანიას თქმით, თანამედროვეობაში ისეთი არქიტექტურა უნდა შეიქმნას, რომელიც სამომავლოდ ისტორიული მემკვიდრეობა გახდება. „თუ ჩვენ ვერ ვქმნით ისეთ შენობებს, რომლებიც მომავალში ძეგლის სტატუსს დაიმსახურებენ, ესე იგი, ვერ ვქმნით ვერაფერს,“ – თქვა მან.

ირაკლი ჟვანია და გია რამიშვილი, საქართველოს და აშშ-ს გამოცდილებაზე საუბრობენ კულტურული მემკვიდრეობის საკითხში.

ირაკლი ჟვანია და გია რამიშვილი საუბრობენ საქართველოსა და აშშ-ს გამოცდილებაზე კულტურული მემკვიდრეობის საკითხში.

გია რამიშვილმა ისაუბრა საზოგადოებრივ როლზე კულტურული მემკვიდრეობის დაცვაში. „ფილმში საუბარი იყო იმაზე, რომ ხალხი სთხოვს ხელისუფლებას და ხელისუფლება ასრულებს. ინიციატივა კულტურული მემკვიდრეობის დაცვაზე ყოველთვის მოდის ქვევიდან ზევით და არა პირიქით,“- ამბობს ის.

არქიტექტორების თქმით,  კონკრეტულ პროექტზე უნდა არსებობდეს არა ერთი ხელოვნებათმცოდნის, არამედ კვალიფიციური და გამოცდილი ორგანიზაციის დასკვნა, რომ ესა თუ ის პროექტი არ ამახინჯებს ისტორიულ, კულტურულ გარემოს და დაცულია ყველა ნორმა.

ფილმის ჩვენება და დისკუსია ბათუმის „ამერიკულ კუთხეში“ აშშ-საქართველოს 25-წლიანი ურთიერთობის კვირეულის ფარგლებში გაიმართა.

„მშვიდობის კორპუსის“ მონაწილე მერი ჩენდლერი

„მშვიდობის კორპუსის“ მონაწილე მერი ჩენდლერი

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com