Batumelebi | ბათუმის რიგ უბნებში საარჩევნო პლაკატების განთავსების წესი შეიცვალა ბათუმის რიგ უბნებში საარჩევნო პლაკატების განთავსების წესი შეიცვალა – Batumelebi
RU | GE  

ბათუმის რიგ უბნებში საარჩევნო პლაკატების განთავსების წესი შეიცვალა

 

ბათუმის საკრებულომ ბათუმში საარჩევნო პლაკატების განთავსებასთან დაკავშირებულ დადგენილებაში ცვლილებები შეიტანა.  

 

დღემდე მოქმედი წესით ძველი ბათუმის ტერიტორიაზე და ქალაქის ცენტრალურ უბნებში საარჩევნო-სააგიტაციო მასალის განთავსება,  შენობა-ნაგებობების კედლებზე აკრძალული იყო. ცვლილების მიხედვით კი ამიერიდან დაიშვება გამონაკლისი. კერძოდ: დასაშვები ხდება ბათუმის ცენტრალურ ზონაში მდებარე საარჩევნო სუბიექტების  (პარტიების) ოფისებზე სააგიტაციო მასალების გამოფენა.  რაც შეეხება დანარჩენ შენობებს, მოქმედი წესი უცვლელი რჩება და სააგიტაციო მასალის გამოკვრა ძველ ბათუმში შენობებზე აკრძალულია.

 

ცვლილების აუცილებლობა საკრებულოში ასე განმარტეს: „როგორც წესის მიღების შემდეგ ჩატარებულმა არჩევნებმა ცხადყო, იმის გამო რომ  აკრძალულ ზონაში მდებარეობს საარჩევნო სუბიექტების უმრავლესობის პარტიული ოფისები, მაინც ხდებოდა ოფისების შენობა ნაგებობებზე სააგიტაციო მასალის განთავსება“.

 

2012 წლის აგვისტოში ბათუმის საკრებულომ მიიღო დადგენილება „საარჩევნო პლაკატების განთავსებასთან დაკავშირებული ზოგიერთი საკითხის მოწესრიგების შესახებ“. ამ დადგენილებით ბათუმის ცენტრალურ ნაწილში, ძველ ბათუმში, ბულვარში და მის მიმდებარე ტერიტორიაზე არსებულ შენობა-ნაგებობეზე აკრძალული იქნა სააგიტაციო მასალის გამოფენა.

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"