აჭარის მთავრობამ ბიზნესმენ ირის ბორჩაშვილს საინვესტიციო პირობები შეუცვალა


 

აჭარის ფინანსთა და ეკონომიკის მინისტრის, დავით ბალაძის განცხადებით, ბიზნესმენმა ირის ბორჩაშვილმა აჭარის მთავრობასთან საინვესტიციო ხელშეკრულებებით გათვალისწინებული პირობებიდან მხოლოდ ერთი დაარღვია. მინისტრის განცხადებით, პირობის დარღვევის მიზეზი ხელშეკრულებაში არსებული უზუსტობა გახდა.  

 

„ბიზნესმენმა განაცხადა, რომ ხელშეკრულებაში მითითებული საინვესტიციო თანხა 12 მილიონი დოლარი, შეცდომითაა ჩაწერილი. 12 მილიონი ლარი უნდა ყოფილიყო ჩაწერილიო. ამიტომ, ჩვენ ვაპირებთ შევცვალოთ სახელშეკრულებო პირობები და საინვესტიციო თანხა რვა მილიონი ლარით განვსაზღვროთ. ასევე, საცხოვრებელ სახლში 400 კვ/მ ფართი გადმოეცემა აჭარის მთავრობას, რადგან ის გამოყენებული იქნას მეწყერით დაზარალებული მოსახლეობისთვის“- განაცხადა მინისტრმა.

 

ინესტორმა საცხოვრებელი სახლი ბათუმში, ჭავჭავაძისა და ლუკა ასათიანის ქუჩების კვეთაში, „თი ბი სი“ ბანკის გვერდით არსებულ მიწის ნაკვეთზე უნდა ააშენოს. 

 

საცხოვრებელი სახლის მშენებელობა ინვესტორმა 2014 წლის აგვისტოში უნდა დაიწყოს და 2016 წელს დაასრულოს. თუკი ინვესტორი აგვისტოში არ დაიწყებს მშენებლობას, როგორც მინისტრმა განაცხადა პირობების შეუსრულებლობის მოტივით, ქონება ინვესტორს ჩამოერთმევა და დაუბრუნდება სახელმწიფოს. 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე