ქრთამის მიცემის ფაქტი – საზოგადოებისთვის სასარგებლო, უსასყიდლო შრომისგან თავის ასარიდებლად – სასჯელაღსრულების სამინისტრომ დააფიქსირა. უწყების საგამოძიებო დეპარტამენტის ინფორმაციით, სისხლის სამართლის წესით განრიდებულმა პირმა ი.ქ-მ შრომისგან თავის არიდების სანაცვლოდ, ქრთამის სახით 1000 ლარი გადასცა პრობაციის ოფიცერს, ვ.თ.-ს.
სასჯელაღსრულების სამინისტროს პრესსამსახურის ინფორმაციით, სწორედ ოფიცერმა შეატყობინა საგამოძიებო ორგანოს ქრთამის შეთავაზების შესახებ.
გამოძიება მიმდინარეობს სისხლის სამართლის კოდექსის 339-ე მუხლის მე-2 ნაწილით, რაც უკანონო ქმედების ჩასადენად მოხელისათვის ქრთამის მიცემას გულისხმობს და ჯარიმას, ან თავისუფლების აღკვეთას ითვალისწინებს ოთხიდან შვიდ წლამდე ვადით.
გამოძიებას სასჯელაღსრულებისა და პრობაციის სამინისტროს საგამოძიებო დეპარტამენტის აღმოსავლეთის სამმართველო აწარმოებს.
