ადგილობრივების თქმით, კორპუსებს პრობლემები თავიდანვე ჰქონდა. ბზარები კედლებზე და ნესტისგან სველი კედლები – ამ მიზეზით დევნილთა დასახლების კორპუსებს, სარემონტო სამუშაოები რამდენჯერმე ჩაუტარდა.
“წყალი შემოდის კედლიდან, კედელი სულ გაშავებულია, უკვე ორჯერ გავარემონტე და ხელახლა გასაკეთებელია” – ამბობს როზა გერგედავა, მისი თქმით დანარჩენ კორპუსებსაც ანალოგიური პრობლემა აქვთ.
ამ ეტაპზე კორპუსებს თბოიზოლაცია უკეთდება. სარემონტო სამუშაოები უკვე სამი თვეა მიმდინარეობს. სამუშაოთა მწარმოებლის თქმით თბოიზოლაცია გულისხმობს პენოპლასტითა და სხვა წყალგაუმტარი მასალით კედლების დაფარვას – “შენობა გარე ფაქტორებიდან დაცულია, ანუ გამორიცხულია წყლის შესვლა კედელში”.
დევნილთა დასახლების მე–2 კორპუსის მეორე სართულზე, 12 მარტს ელექტრო სადენებს ხანძარი გაუჩნდა, რის გამოც მეორე სართულზე ვიტალი ძანძავას ბინა დაიწვა – “ხანძრის მიზეზი იყო დენი, ბავშვები ძლივს გამოვიყვანეთ სახლიდან, პრობლემა ჩვენ რომ გვავქვს ისეთი არც ერთ კორპუსს არ აქვს. მერიას მივმართეთ განაცხადეით ოცი დღის წინ და დაგვპირდნენ, რომ ბინის შეკეთებას ორშაბათიდან დაიწყებენ” – ამბობს ის.
როზა გერგედავას თქმით, ხანძრის შედეგად გაშავებული სადარბაზოს შეღებვის თაობაზე პასუხი მერიისგან ჯერ არ მიუღიათ.
