ნეტგაზეთი • RU

აჭარაში მიწებს წელსაც სახელმწიფო კომპანიის ტექნიკით ხნავენ

სახნავ-სათეს მიწებს აჭარაში, გასული წლების მსგავსად, წელსაც სოფლის მეურნეობის სამინისტროს შპს „მექანიზატორი“ დაამუშავებს.

„მექანიზატორის“ ტექნიკით, ერთი ჰექტარი მიწის დამუშავება 140 ლარი ღირს, თუმცა ეს ტარიფი მხოლოდ ვაკე ადგილებზე ვრცელდება, იმ შემთხვევაში, თუ დასამუშავებელი მიწა დახრილ ფერდობიანია, ტარიფი მატულობს და თანხის ოდენობას, ძირითადად, ნაკვეთის დახრილობა განსაზღვრავს. ნაკვეთის დახრილობის შესაბამისად ერთ ჰექტარზე ტარიფი შეიძლება 10, 20 ან 30 ლარით გაიზარდოს.

„რეგიონის მასშტაბით, ამ დროისთვის დაახლოებით 20 ჰექტარი მიწა გვექნება დამუშავებული, სამუშაო პროცესს სადღესასწაულო დღეების შემდეგ განვაახლებთ
და მოსახლეობას მუნიციპალიტეტებში „მექანიზატორის“ 26 ტრაქტორი მოემსახურება, ყველა მათგანი გამართულ მდგომარეობაშია, რაც შეეხება მიწის დამუშავების ტარიფს, იქედან გამომდინარე, რომ დახრილ ფერდობიან ნაკვეთში მიწის მოსახნელად ტრაქტორს მეტი გადაადგილება და შესაბამისად საწვავიც მეტი სჭირდება ტარიფი მატულობს“ – ამბობს ზურაბ ბერიძე, „მექანიზატორის“ სერვისცენტრის მენეჯერი აჭარაში.

იმ შემთხვევაში თუ ფერმერმა საკუთარი მიწა „მექანიზატორის“ ტექნიკით უნდა დაამუშაოს, მან მიწის დამუშავების ფიქსირებულ გადასახადთან ერთად ტრაქტორის გადაადგილების თანხაც უნდა გადაიხადოს, ტექნიკის გადაადგილების ფასი ერთ კილომეტრზე 1 ლარი ღირს. მიწის დამუშავებისა და ტექნიკის საკუთარ ნაკვეთამდე გადაადგილების მომსახურების თანხის გადახდა ფერმერებს საქართველოსა და „ლიბერთი ბანკში“ შეეძლებათ.

„ქედის მუნიციპალიტეტში, სოფლები სადაც თამბაქო გამოჰყავთ, მიწებს შედარებით ადრე ამუშავებენ, ვიდრე იქ სადაც სიმინდი ითესება, ასეთი აქ კი დანდალოსა და ვაიოს თემის სოფლებია, დანდალოს თემში მიწები თითქმის მოიხნა, ვაიოს თემში გადავინაცვლებთ, ქედაში ოთხი ტრაქტორი გვაქვს, რაც სრულიად საკმარია მიწების დროულად დასამუშავებლად“ – ამბობს შპს „მექანიზატორის“ ქედის მუნიციპალიტეტის ბრიგადის მენეჯერის, ზურაბ სურმანიძე.

ნეტგაზეთის მასალების სხვა გამოცემებში გადაბეჭდვის წესი
ავტორი