ხელვაჩაურში, სოფელ ფერიის გიგინეიშვილების დასახლებაში წყლის სისტემა ხელვაჩაურის მუნიციპალიტეტმა 2015 წელს მოაწყო. მოსახლეობა ამბობს, რომ აღდგენიდან დღემდე ანუ ორ წელზე მეტია სასმელი წყალი არ მიეწოდება.
„დაახლოებით ნახევარი დღე მოდიოდა ონკანიდან ჟანგიანი, ყვითელი წყალი. მერე მილებიც დასკდა და წყალიც წავიდა,“ – ამბობს ნარგიზ ბეჟანიძე. ის და კიდევ 83 ოჯახი გიგინეიშვილების დასახლებაში ცხოვრობს.
„მე ჩემი სახსრებით მოვიყვანე წყალი მეზობელი სოფლიდან, კიდევ რამდენიმე ოჯახმაც მოახერხა იგივე და სხვები ჩვენგან ეზიდებიან წყალს, ზოგს წყაროდან მოაქვს, მაგრამ ზაფხულში შრება ესეც, უწყლოდ ვრჩებით ყველა,“ – გვიყვება ნარგიზ ბეჟანიძე.
ფერიაში წყლის სისტემის მოსაწყობად ხელვაჩაურის მუნიციპალიტეტის ბიუჯეტიდან 2015 წელს 146 ათასი ლარი დაიხარჯა. სამუშაოები კომპანია „ლაზარე 2008“-მ ჩაატარა.
„სამუშაოები ჩაიბარა ხელვაჩაურის გამგებელმა, ნადიმ ვარშანიძემ უპასუხისმგებლოდ. ოჯახებს ორ წელზე მეტია არ მიეწოდებათ წყალი და ამ პერიოდში სისტემის გამართვაც ვერ მოახერხა გამგეობამ, მიუხედავად იმისა, რომ სისტემის მოწყობიდან ორი წლის განმავლობაში შემსრულებელ კომპანიას აღებული ჰქონდა ვალდებულება შეკეთებაზე, თუკი რამე გაფუჭდებოდა,“ – ამბობს ხელვაჩაურის საკრებულოს წევრი „ერთიანი ნაციონალური მოძრაობიდან“ მიხეილ ბოლქვაძე. მან დღეს ფერიაში ბრიფინგი გამართა.
„ტყუილია ეს ინფორმაციები“, – ამბობს „ბათუმელებთან“ ნადიმ ვარშანიძე, ხელვაჩაურის მუნიციპალიტეტის გამგებელი. მისი თქმით, მოსახლეობას მხოლოდ ბოლო სამი თვის განმავლობაში შეექმნა პრობლემა, რადგან გზის გაყვანის გამო მილები დაზიანდა და „ეს დრო ბიუროკრატიულ პროცედურებს დასჭირდა“. ნადიმ ვარშანიძე ამბობს, რომ ფერიის მოსახლეობას დაახლოებით 5 დღეში აღუდგება წყლის მიწოდება.
„საიდან იქნებოდა ბინძური, როცა მტირალადან მოდიოდა ეს წყალი, მთელი ბათუმი მაგას სვამს. რომელიმე ღელიდან რომ ყოფილიყო აღებული, მაშინ შეიძლება ყოფილიყო ბინძური… მაგ ხალხს საერთოდ არ ჰქონდა წყალი მანამდე, პირველად გაკეთდა. კიდევ იქნება ხარვეზები, რადგან იქ, სადაც მუშაობა მიდის, ყოველთვის არის რაღაც ხარვეზი“, – გვითხრა ნადიმ ვარშანიძემ.
