13 მარტს ბათუმის დემოკრატიული ჩართულობის ცენტრში „საქართველოს ერთიანი კავშირის“ კოორდინატორმა ჯუმბერ თავართქილაძემ ბათუმის 11 მარტის საპროტესტო აქციის თემაზე ბრიფინგი გამართა:
„11 მარტს დატრიალებული ტრაგედია უნდა გაიყოს ორ ნაწილად. ის, რომ პლაზის მიმდებარე ტერიტორიაზე საზოგადოება შეიკრიბა, იყო საპატრულო სამსახურის ხელმძღვანელობის მიერ გატარებული არასწორი პოლიტიკური კურსით გამოწვეული ბრაზი, საპროტესტო აქციის მეორე ნაწილი კი (რაც პოლიციის სამმართველოსთან მოხდა), იყო ბათუმის მოძულეთაგან გაკეთებული აქცია, კარგად ორგანიზებული სუსისა და ნაციონალური მოძრაობის მიერ. საინტერესოა, რატომ ვერ შეძლო ხელისუფლებამ ამის პრევენცია”, – განაცხადა ჯუმბერ თავართქილაძემ.
ჟურნალისტების კითხვას, საპროტესტო აქციის ორგანიზებაში მერაბ ღოღობერიძის ჩართულობასთან დაკავშირებით, ჯუმბერ თავართქილაძემ ასე უპასუხა: “მე ვერ ვხედავ მერაბ ღოღობერიძეს ამ მოვლენებში დამნაშავედ, არ მგონია, რომ მერაბ ღოღობერიძეს ჰქონოდა ის ძალა, რომ ამდენი ხალხი შეეკრიბა”.
