ზურაბ პატარაძე: „სამწუხაროდ, ჩვენ აქ ვხედავთ პოლიტიკურ ელფერსაც“

აჭარის მთავრობის თავმჯდომარე ზურაბ პატარაძე ეჭვობს, რომ გუშინდელ საპროტესტო აქციას ბათუმში პოლიციის წინააღმდეგ პოლიტიკური ელფერი ჰქონდა, ამის შესახებ მან აჭარის პოლიციის მთავარ სამმართველოსთან განვითარებული მოვლენების შეფასაბისას განაცხადა:

„ სახელმწიფო, ქალაქი, რეგიონი არ შეეგუება ვანდალიზმს, არ შეეგუება უსამართლობას, არ შეეგუება იმ ქმედებებს, რომელიც გუშინ, სამწუხაროდ, ბათუმში განვითარდა. სამწუხაროდ, ჩვენ აქ ვხედავთ პოლიტიკურ ელფერსაც.

ზოგიერთი ჩვენი ოპონენტი, პოლიტიკური პარტიები ცდილობენ გადაიყვანონ ეს სხვა სიბრტყეში. კადრებში ჩანდნენ სხვადასხვა პარტიის წარმომადგენლები. ჩვენთვის ყოვლად მიუღებელია, რომ ჩვენი შვილები ჩართული იყვნენ მსგავს აქციებში.

ამასთან ერთად, ჩვენ უნდა დავაცადოთ სამართალდამცავ ორგანოებს, კვალიფიციურად, ხარისხიანად და დროულად ჩაატარონ გამოძიება და უახლოეს პერიოდში ჩვენ გვექნება დასკვნები. ბოლომდე შევისწავლით, თუ რა იყო მიზეზები, თუ ვინ ედგა სათავეში ამ ყველაფერს და ვინ მოახდინა პროვოცირება. პირველ რიგში, ჩვენ აუცილებლად უნდა დაველოდოთ გამოძიებას”, – განაცხადა აჭარის მთავრობის თავმჯდომარემ.

ზურაბ პატარაძის კომეტარი „ბათუმელებს“ პრესსამსახურმა მიაწოდა.