15 თებერვალს, 18:00 საათზე, საქართველოს ყველა დიდ ქალაქში იმართება საპროტესტო მარში – „ჩვენი არჩევანი არის ან თავისუფლება, ან რუსული დიქტატურა!“.
„დღეს საქართველოს ხელისუფლება რუსული სცენარით ახორციელებს რეპრესიებს, ზღუდავს სიტყვის თავისუფლებას, ამკაცრებს კანონმდებლობას და ცდილობს, ქვეყანა კრემლის გავლენის ქვეშ მოაქციოს!
თუ არ გავაპროტესტებთ, საქართველო გადაიქცევა პუტინის რუსეთის ანალოგიურ დიქტატურად, სადაც:
- დაპატიმრებები და რეპრესიები გახდება ყოველდღიურობა!
- სიტყვის თავისუფლება დაიხშობა, მედია კი სრულად დაექვემდებარება რეჟიმს!
- შეკრებისა და პროტესტის უფლება აღარ იარსებებს!
- ქვეყანა საბოლოოდ ჩამოშორდება ევროპას და აღმოჩნდება რუსეთის ბნელი გავლენის ქვეშ!
ეს ბრძოლა არის ჩვენი ქვეყნის გადარჩენისთვის! თუ ახლა არ შევაჩერებთ ამ პროცესს, ხვალ გვიანი იქნება!“ – წერენ აქტივისტები.
ბათუმში მარშის მონაწილეები შაბათს, 15 თებერვალს 18:00 საათზე ცენტრალური პარკის კოლონადებთან შეიკრიბებიან, საიდანაც მსვლელობა გაიმართება საკონსტიტუციო სასამართლოსკენ.
გარდა ამისა, ასევე შაბათს, 15 თებერვალს, 13:00 საათზე იგეგმება თემურ ქათამაძის, მზია ამაღლობელის, ზვიად ცეცხლაძის, ანრი კაკაბაძის და სხვა პოლიტიკური ტყვეების მხარდასაჭერი შეკრება-აქცია სარფში.
„ჩვენი პირველი გასვლა ბათუმის ფარგლებს გარეთ მნიშვნელოვანი და სიმბოლური იყო. მეორე გასვლაც, გვინდა, რომ ასეთივე გამოვიდეს – სარფი შეირჩა საიმისოდ, რომ ერთგვარად ხაზი გავუსვათ თემურის, როგორც მუჰაჯირების შთამომავლის წარსულს და მის დაუღალავ ჯაფას ჩვენებურების [თურქეთის ქართველობის] კულტურული ბმის აღსანიშნად ისტორიულ სამშობლოსთან. მთავარია, მივაწვდინოთ ხმა გონიო-სარფის ერთეულში მოქალაქეებს, რომ შემოგვიერთდნენ.
დარწმუნებული ვარ, სარფშიც შინაარსებით გაჯერებული შეხვედრა იქნება. ბათუმში 15:00 საათის მერე დავბრუნდებით და 18:00-საათიან მარშს შევუერთდებით“ – წერენ აქტივისტები განცხადებაში.
გასვლა იგეგმება 12 საათზე ევროპის მოედნიდან.
