ხულოს მუნიციპალიტეტის გამგეობა ხულოში მცხოვრებ 45 მრავალშვილიან დედას დანების შეკვრასა და წყლის ელექტრომადუღარას გადასცემს.
ტენდერში გამარჯვებულმა 45 შეკვრა [ერთ შეკვრაში ხუთი დანა] დანა და ამავე ოდენობის წყლის მადუღარა უნდა შეიძინოს.
დანების შეკვრასა და წყლის მადუღარასთან ერთად, ამავე ტენდერში ხულოს გამგეობამ სუფრის ორგანიზება [20 კაცზე] ჩადო მოთხოვნად, სუფრა კი მწვადით, ოჯახურით, ხაჭაპურით, სინორით, ქათმის შემწვარი ტაბაკით, შემწვარი ხორცით, მწვნილის ასორტით, თევზით, პურით, მჭადით, მინერალური წყალითა და ლიმონათით უნდა იყოს გაწყობილი. გამგეობას 100 მისალოცი ბარათი და ამდენივე მიხაკი უნდა მიაწოდონ.
დედისა და ქალთა საერთაშორისო დღისადმი მიძღვნილი ღონისძიებების ორგანიზების შესყიდვაზე 23 თებერვალს გამოცხადებული ტენდერი 1-ელ მარტს დასრულდა, მონაწილეობის სურვილი მხოლოდ შპს „არსი 2“ -მა გამოთქვა. შესყიდვის სავარაუდო ღირებულება 3 080 ლარი იყო „არსი 2“ კი მომსახურებას გამგეობას 2 980 ლარად სთავაზობს. ხელშეკრულება ტენდერში გამარჯვებულ კომპანიასთან ხულოს გამგეობას ჯერ არ გაუფორმებია.
სატენდერო პირობა: ტენდერში გამარჯვებულმა ფოტოზე გამოსახული ნივთების ანალოგიური უნდა შეიძინოს
