Batumelebi | აჭარის ტურიზმის დეპარტამენტი გიდების სახელმძღვანელოს გამოსცემს აჭარის ტურიზმის დეპარტამენტი გიდების სახელმძღვანელოს გამოსცემს – Batumelebi
RU | GE  

აჭარის ტურიზმის დეპარტამენტი გიდების სახელმძღვანელოს გამოსცემს

21 თებერვარს, გიდების საერთაშორისო დღეს, აჭარის ტურიზმის დეპარტამენტმა რეგიონში მოქმედ გიდებს ახალი პროექტები გააცნო.

დეპარტამენტის ინფორმაციით, გიდების სახელმძღვანელო, მაღალმთიანი აჭარის მარშრუტებზე გიდების გადამზადება და გიდებისთვის ხარისხის ნიშნის „რეკომენდებულია ტურიზმის დეპარტამენტის მიერ“ მინიჭება – ის პროექტებია, რომლებსაც აჭარის ტურიზმის დეპარტამენტი და ტურისტული პროდუქტების განვითარების სააგენტო წელს აჭარაში გიდების მომსახურების ხარისხის გაუმჯობესების მიზნით განახორციელებს.

აჭარის ტურიზმის დეპარტამენტი წელს გიდების პრაქტიკული სახელმძღვანელოს შექმნას გეგმავს. სახელმძღვანელოში აღწერილი იქნება გიდის პროფესიისთვის აუცილებელი პრაქტიკული და თეორიული საკითხები, ინფორმაცია პრაქტიკული უნარ-ჩვევების შესახებ. ასევე აჭარაში არსებული ტურისტული ღირშესანიშნაობებისა და მარშრუტების ჩამონათვალი მუნიციპალიტეტების მიხედვით თავისი ლინკებითა და საძიებო სისტემებით. დეპარტამენტის ცნობით, სახელმძღვანელო აჭარაში არსებულ ყველა იმ სასწავლებელში დარიგდება, სადაც გიდებს ამზადებენ.

ჯერჯერობით უცნობია სახელმძღვანელოს ავტორების ვინაობა. დეპარტამენტში ამბობენ, რომ ამ საკითხზე მარტში დაიწყებენ მუშაობას, სახელმძღვანელო კი, სავარაუდოდ, წლის მეორე ნახევარში გამოვა.

წელს პროექტის – „რეკომენდებულია ტურიზმის დეპარტამენტის მიერ“ – ფარგლებში ბათუმის, მთიანი აჭარისა და დაცული ტერიტორიების გიდების მომზადებაც იგეგმება. პროექტში ჩართულ გიდებს სურვილის შემთხვევაში შეუძლიათ ტრენინგებში ჩაერთონ ან პირდაპირ გავიდნენ ხარისხის ნიშნის მისაღებ გამოცდაზე. გიდების განათლების დონე პროფილური ტესტირებითა და პრაქტიკული გამოცდით შემოწმდება. ის, ვინც ყველა გამოცდას წარმატებით გაივლის, გახდება ტურიზმის დეპარტამენტის მიერ რეკომენდებული გიდი.

აჭარის ტურიზმისა და კურორტების დეპარტამენტის ინფორმაციით, მაღალმთიანი აჭარის ცალკეული ტურისტული მარშრუტის მიმართულებით იგეგმება გიდების გადამზადება. დაინტერესებულ გიდებს შესაძლებლობა მიეცემათ ტრენინგებზე გაიღრმავონ თეორიული და პრაქტიკული ცოდნა კონკრეტული ტურისტული მარშრუტების მიმართულებით.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com