ნოდარ დუმბაძე- ბათუმის საკრებულოს „ ერთიანი ნაციონალური მოძრაობის“ ფრაქციის თავმჯდომარე.
„მართმევს სამსახურეობრივ ავტომანქანას. ბრძანებაში დაწერა, რომ გადაწყვეტილება მართვის მოწმობის არქონის გამო მიიღო. სამწუხაროა, რომ საკრებულოს თავმჯდომარე ჭორებზე დაყრდნობით იღებს გადაწყვეტილებებს. საინტერესოა სად გაიგო და ვინ უთხრა, რომ მართვის მოწმობა არ მქონდა. ამ ბრძანების მიხედვით მერიის უკანა ეზოში უნდა გავეჩერო თურმე მანქანა. დამიბლოკეს ასევე საწვავის პლასტიკური ბარათი.“ – განაცხადა ნოდარ დუმბაძემ ბრიფინგზე.
ბათუმის საკრებულოს თავმჯდომარის ირაკლი ჩავლეითვლის 12 აპრილის ბრძანებაში #01/39, რომელიც „ერთიანი ნაციონალური მოძრაობის“ თავმჯდომარისთვის სამსახურეობრივი ავტომანქანის დროებით ჩამორთმევას ითვალისწინებს, ნათქვამია ასევე, რომ ამ გადაწყვეტილების მიღებამდე ნოდარ დუმბაძეს მართვის მოწმობის გარეშე სამსახურეობრივი ავტომანქანის ტარებასთან დაკავშირებით გაფრთხილება მიეცა, თუმცა მან ეს არ გაითვალისწინა.
ბრძანების შეუსრულებლობის შემთხვევაში საკრებულოს თავმჯდომარე აპარატის უფროსს ლიანა დიასამიძეს ავალებს ამის შესახებ შინაგან საქმეთა სამინისტროს საპატრულო პოლიციის დეპარტამენტის აჭარის სამსახურს აცნობოს.
ნოდარ დუმბაძე მანქანის ჩაბარებას არ აპირებს: „ძალიან სასაცილო ბრძანებაა. ალბათ ვალერი თელიაში შევეშალე.“
ნოდარ დუმბაძე მიიჩნევს, რომ მსგავსი ბრძნებებით საკრებულოს თავმჯდომარე მისი როგორც ფრაქციის თავმჯდომარის დისკრიმინაციას უწყობს ხელს.
ირაკლი ჩავლეიშვილი საქართველოში არ იმყოფება, ნოდარ დუმბაძეს მისმა მოადგილემ უპასუხა. ვაჟა ვერულიძის თქმით „ნოდარ დუმბაძეს სამსახურეობრივი მანქანა და საწვავის პლასტიკური ბარათი დღესვე დაუბრუნდება.“
